واٹس ایپ میں وائس میسجز کا جواب دینے کے لیے نیا آسان فیچر متعارف

واٹس ایپ نے وائس میسجز کا جواب دینے کا عمل آسان بنانے کے لیے نیا فیچر متعارف کروا دیا۔

واٹس ایپ کا نیا فیچر صارفین کو تیز اور سہولت بخش انداز میں جواب ریکارڈ کرنے کی سہولت فراہم کرتا ہے۔ اس نئے اپڈیٹ کے تحت صارفین کو میسج کا جواب دینے کے لیے نہ تو میسج کو سوائپ کرنا پڑے گا اور نہ ہی اسے دستی طور پر منتخب کرنے کی ضرورت ہوگی۔ صرف ایک بٹن دبانے سے جواب ریکارڈ اور بھیجا جا سکے گا۔

یہ فیچر واٹس ایپ کے تازہ ترین بیٹا ورژن (2.24.26.6) پر اینڈرائیڈ صارفین کے لیے دستیاب ہے، جو گوگل پلے اسٹور سے ڈاؤن لوڈ کیا جا سکتا ہے۔ وائس میسجز کے ساتھ ایک خاص بٹن فراہم کیا گیا ہے جو صارفین کو آڈیو سنتے وقت ظاہر ہوتا ہے۔

بٹن پر ٹیپ کرتے ہی صارفین فوری طور پر اپنا جواب ریکارڈ کر سکتے ہیں، بغیر چیٹ کے صفحے سے ہٹے یا میسج کو منتخب کیے۔ریکارڈ شدہ جواب براہ راست اصل وائس میسج کے ساتھ منسلک ہو گا، جس سے چیٹ کا نظم و نسق اور وضاحت بہتر ہو گی۔

یہ اپڈیٹ خاص طور پر ان صارفین کے لیے مفید ہے جو وائس نوٹس پر زیادہ انحصار کرتے ہیں اور تیز رفتار بات چیت میں فوری جواب دینے کی ضرورت محسوس کرتے ہیں۔ وائس میسجز کے ذریعے بات چیت کو مزید ہموار اور موثر بنانے کی امید کی جا رہی ہے۔