احتساب عدالت کے جج کی جانب سے 190 ملین پاؤنڈ کیس میں عمران خان اور بشریٰ بی بی کے خلاف متوقع فیصلہ مؤخر کئے جانے پر چئیرمین پی ٹی آئی بیرسٹر گوہر علی خان نے ردعمل کا اظہار کرتے کہا ہے کہ فیصلہ مؤخر ہونا کسی ڈیل کا حصہ نہیں ہے۔
پی ٹی آئی رہنما بیرسٹر گوہر اور سلمان اکرم راجہ نے اڈیالہ جیل کے باہر میڈیا سے گفتگو کرتے کہا کہ ہم تو ذہنی طور پر تیار تھے کہ آج فیصلہ سنایا جانا ہے، فیصلے کے لیے ہم تیار ہو کر آئے تھے، ہمیں نہیں پتا جج اتنی جلدی میں کیسے چلے گئے۔
بیرسٹر گوہر نے کہا کہ القادر ٹرسٹ کا مقصد بانی پر پریشر بنانا تھا، بانی پی ٹی آئی ان کے پریشر میں آنے والے نہیں ہیں ،آج کا فیصلہ مؤخر ہونے کی وجہ ہم نہیں ہیں، جج صاحب نے خود وقت سے قبل ہی فیصلہ مؤخر کر دیا۔
اس دوران سیکریٹری جنرل سلمان اکرم راجہ نے کہا کہ یہ تاثر دیا جارہا ہے کہ ڈیل ہورہی ہے، کوئی ڈیل نہیں ہورہی، مذاکراتی عمل جاری ہے، تیسرا دور 15 جنوری کو ہوگا۔
واضح رہے کہ پاکستان تحریک انصاف (پی ٹی آئی) کے بانی عمران خان اور ان کی اہلیہ بشریٰ بی بی کے خلاف 190 ملین پاؤنڈز ریفرنس کا فیصلہ ایک بار پھر مؤخر کردیا گیا۔
خیال رہے کہ 190 ملین پاؤنڈز ریفرنس کا فیصلہ تیسری بار مؤخر کیا گیا ہے، احتساب عدالت نے فیصلہ 18 دسمبر 2024 کو محفوظ کیا تھا، احتساب عدالت نے فیصلہ سنانے کیلئے پہلے 23 دسمبر اور اس کے بعد 6 جنوری کی تاریخ مقرر کی تھی پھر تیسری بار 13 جنوری کی تاریخ دی۔
By 
