سابق اسپنر عبدالرحمان پاکستان کے نئے اسپن بولنگ کوچ قرار

پاکستان کرکٹ بورڈ (پی سی بی) نے قومی ٹیم کے اسپن بولنگ کوچ کے طور پر سابق ٹیسٹ اسپنر عبدالرحمان کی خدمات حاصل کرلیں۔

شان مسعود کی قیادت میں پاکستان ٹیم ملتان میں موجود ہے جہاں ویسٹ انڈیز کے خلاف 17 جنوری سے پہلا ٹیسٹ کھیلا جائے گا جبکہ سیریز 2 میچوں پر مشتمل ہے۔

قومی سلیکشن کمیٹی نے سیریز کے لیے 15 رکنی ٹیسٹ اسکواڈ کا اعلان کیا ہے جس میں تین اسپنرز نعمان علی، ابرار احمد اور ساجد خان شامل ہیں۔

یہ بھی پڑھیں: ملک بھر میں سردی کی شدید لہر ، آئندہ 24 گھنٹے بھی موسم سرد رہنے کا امکان

اسپن بولنگ کوچ عبدالرحمان نے 2006 سے 2014 کے درمیان ٹیسٹ، ون ڈے انٹرنیشنلز اور ٹی 20 میں پاکستان کے لیے 140 وکٹیں لیں۔

سیالکوٹ سے تعلق رکھنے والے عبدالرحمان رواں سال یکم مارچ کو اپنی  45ویں سالگرہ منائیں گے، انہوں نے اکتوبر 2018 میں بین الاقوامی کرکٹ سے ریٹائرمنٹ کا کا اعلان کیا تھا۔

اس سے قبل وہ پاکستان ویمن کرکٹ ٹیم کے کوچنگ اسٹاف کا حصہ تھے، مینز ٹیم کے ساتھ بطور اسپن بولنگ کوچ ان کا پہلا تجربہ ہوگا۔