جے آئی ٹی نے بیرسٹر گوہر، سلمان اکرم راجہ، شیخ وقاص اکرم، حماد اظہر، اسد قیصر سمیت دیگر کو نوٹس جاری کر دیا

حکومت نے سوشل میڈیا پر منفی پروپیگنڈا کرنے والوں کیخلاف گھیرا تنگ کرلیا۔ جوائنٹ انویسٹی گیشن ٹیم نے پاکستان تحریک انصاف کی سینئر قیادت کو طلب کرلیا۔

ذرائع کے مطابق وفاقی حکومت کی قائم کردہ جے آئی ٹی نے منفی پروپگینڈا کرنے کے الزام میں پاکستان تحریک انصاف کی سینئر قیادت کو نوٹسز جاری کر کے طلب کرلیا۔

جن رہنمائوں کو طلب کیا گیا ان میں چئیرمین پی ٹی آئی بیرسٹر گوہر خان، سیکرٹری جنرل سلمان اکرم راجہ، سیکرٹری اطلاعات شیخ وقاص اکرم، رئوف حسن، سید شیم نقوی، محمد خالد خورشید، میاں اسلم اقبال، حماد اظہر، عون عباسی بپی، عالیہ ملک، شہباز شبیر، کنول شوزب، تیمور جھگڑا، اسد قیصر اور شاہ فرمان شامل ہیں۔

جے آئی ٹی کو بذریعہ نوٹیفیکیشن F.No.8/9/2024-FIA/الیکٹرانک جرائم کی روک تھام ایکٹ 2016 کے سیکشن 30 کے تحت تشکیل دیا گیا تھا۔ جے آئی ٹی انسپکٹر جنرل آف پولیس، اسلام آباد کی سربراہی میں تحقیقات کر رہی ہے۔ جے آئی ٹی ان افراد کیخلاف تحقیقات کر رہی ہے جنہوں نے سوشل میڈیا پر پاکستان مخالف زہرافشانی کی اور بے بنیاد الزامات عائد کئے۔

ذرائع کا کہنا ہے کہ جے آئی ٹی کا مقصد قانون کے مطابق مجرموں کی شناخت اور ان کے خلاف قانونی کاروائی کرنا ہے۔ ان تمام افراد کو بذریعہ نوٹس 7 مارچ 2025ء دوپہر 12 بجے جے آئی ٹی کے سامنے طلب کیا گیا ہے۔نوٹسز میں ان تمام افراد پر واضح کیا گیا ہے کہ اس معاملے پر اپنی پوزیشن واضح کریں۔