پی ایس ایل 10 کے دسویں میچ میں اسلام آباد یونائیٹڈ نے کراچی کنگز کو 6وکٹوں سے شکست دے دی ۔
نیشنل اسٹیڈیم کراچی میں کھیلے گئے میچ میں کراچی کنگز کے 129 رنز کے جواب میں اسلام آباد یونائیٹڈ نے پرُاعتماد بیٹنگ کا مظاہرہ کرتے ہوئے صرف 4 وکٹوں کے نقصان پر 17اعشارہ 1اوورز میں ہدف پورا کیا۔
اسلام آباد یونائیٹڈ کے کپتان شاداب خان 47 رنز بنا کرنمایاں بیٹر رہے جبکہ اعظم خان نے 31 اور صاحبزادہ فرحان نے 30 رنز بنائے۔ کراچی کنگز کی جانب سے حسن علی نے 2 ، محمد نبی اور عباس آفریدی نے 1،1 وکٹ حاصل کی۔
اس سے قبل کراچی کنگز نے 7 وکٹوں کے نقصان پر 128 رنز اسکور کیے، کراچی کے اوپنر ٹم سائفرٹ نے سب سے زیادہ 30 رنز اسکور کئے سعد بیگ 20 اور خوشدل شاہ 17 رنز بناسکے، ڈیوڈ وارنر 3، جیمز ونس 4 اور عرفان خان 5 رنز بناکرپویلین لوٹے۔
محمد نبی اور عامر جمال 7، 7 رنز بناکرآؤٹ ہوئے تاہم آخر کے اوورز میں عباس آفریدی نے 9 گیندوں پر 24 رنز کی برق رفتار اننگز کھیلی۔ اسلام آباد یونائیٹڈ کے کپتان شاداب خان نے 17 رنز دیکر 2 وکٹیں اپنے نام کیں ، ان کے علاوہ نسیم شاہ اور جیسن ہولڈر نے 2، 2 وکٹیں حاصل کرنے میں کامیاب ہوئے۔
اسلام آباد یونائیٹڈ نے کراچی کنگز کیخلاف ٹاس جیت کر پہلے باؤلنگ کرنے کا فیصلہ کیا تھا۔ ٹاس جیتنے کے بعد گفتگو کرتے ہوئے اسلام آباد یونائیٹڈ کے کپتان شاداب خان کا کہنا تھا کہ پچ میں آسٹریلیا کی مٹی استعمال ہوئی ہے، کوشش کریں گے کہ اپنی حکمت عملی کے مطابق کھیلیں۔
اسلام آباد یونائیٹڈ کی ٹیم میں 2 تبدیلیاں کی گئی ہیں، کراچی کیخلاف میچ کیلئے محمد نواز اور بین ڈوارشیئس کو شامل کیا گیا ہے۔ اُس موقع پر کپتان کراچی کنگز ڈیوڈ وارنرکا کہنا تھا کہ پاکستان میں کرکٹ کا شاندار ٹیلنٹ ہے، ہم بھی ٹاس جیتتے تو پہلے فیلڈنگ کرتے۔ کراچی کنگز نے اسلام آباد کے خلاف میچ کےلیے اپنی ٹیم میں ایک تبدیلی کی ہے اور ریاض اللہ کی جگہ سعد بیگ کو شامل کیا گیا ہے۔
By 
