آپریشن’’بُنْيَانٌ مَّرْصُوْص‘‘ کی کامیابی پرملک بھرمیں یوم تشکر، عوام کا جشن، مٹھائیاں تقسیم

افواج پاکستان کی جانب سے بھارتی جارحیت کا منہ توڑ جواب دینے اور بھارت کی بدترین شکست کے بعد آزاد کشمیر سمیت پاکستان بھر میں یوم تشکر اور جشن منایا گیا، گلیاں، شہر، سڑکیں، بازار، پاک فوج زندہ باد، پاکستان زندہ باد، مودی مردہ باد کے نعروں سے گونج اُٹھیں، عوام کی جانب سے منوں مٹھائی تقسیم کی گئی۔

اتوار کو آزاد کشمیرسمیت ملک بھر میں افواج پاکستان سے اظہار محبت اور یکجہتی کے طور پر ریلیاں نکالی گئیں اور جشن منایا گیا، شہر شہر، گلی گلی افواج پاکستان کو خراج تحسین پیش کرنے کے لیے ریلیوں میں عوام کی کثیر تعداد شریک ہوئی۔ افواج پاکستان کے جوانوں پر پھولوں کی پتیاں نچھاورکی گئیں، انہیں پھولوں کے ہار پہنائے گئے ۔

لندن برطانیہ سمیت، پنجاب، سندھ ، بلوچستان اور خیبر پختونخوا میں عوام کا جم غفیرسبز ہلالی پرچم لیے سڑکوں پر نکل آئے، اسلام آباد، راولپنڈی میں عوام نے مری روڈ پر بڑی ریلی نکالی، اسی طرح  لکی مروت میں فتح کی خوشی میں عوام کی بڑی تعداد نےقومی پرچم اٹھا کر پاک فوج زندہ باد کے نعرے لگائے، شمالی وزیرستان باجوڑ میں بھی بھارتی جارحیت اور افواج پاکستان کی فتح پر ریلی کا انعقاد کیا گیا۔

شمالی علاقہ جات میں چترال میں بھی غیورعوام افواج پاکستان کو خراج تحسین پیش کرنے کے لیے سڑکوں پر نکل آئے، پشاور  کینٹ اور مردان میں بھی عوام کی بڑی تعداد بھارت کے خلاف فتح کا جشن منانے سڑکوں پرآگئی، ڈیرہ اسماعیل خان اور ٹانک میں بھی عوام پاک فوج زندہ باد، بھارت مردہ بات کے نعرے لگاتی سڑکوں پر نکل آئی۔

خیبر پختونخوا کے ضلع سوات میں بھی عوام کی بڑی تعداد نے اپنی بہادر مسلح افواج کو خراج تحسین پیش کیا، مہمند، نوشہرہ  اور قلعہ بالا حصار میں بھی عوام نے فتح کی خوشی میں ریلیوں کا انعقاد کیا ، ریلیوں میں ہر مکتبہ فکر کے افراد نے شرکت کی  اس دوران عوام نے مٹھائیاں بھی تقسیم کی گئیں۔

اسی طرح جماعت اسلامی آزاد کشمیر کی کال پر آزاد کشمیر بھر میں پاک فوج سے اظہار یکجہتی اور بھارت کو کامیابی کے ساتھ منہ توڑ جواب دے اس کا غور خاک میں ملانے پر ’یوم تشکر‘ منایا گیا، مظفرآباد، باغ، بھمبر، کوٹلی راولاکوٹ میں عوام کی بڑی تعداد سڑکوں پر نکل آئی اور پاک فوج زندہ باد، پاکستان پائندہ باد، مودی مردہ باد کے نعرے لگائے۔