مسلح افواج نے پاکستان کی قوت، مزاحمت اور قومی یکجہتی کا دوٹوک پیغام دیا، صدر زرداری

صدر مملکت آصف علی زرداری نے کہا ہے کہ مسلح افواج نے پاکستان کی قوت، مزاحمت اور قومی یکجہتی کا دوٹوک پیغام دیا۔

پاک فوج کے شعبہ تعلقاتِ عامہ آئی ایس پی آر کی جانب سے جاری بیان کے مطابق صدر آصف زرداری نے گوجرانوالہ کینٹ کا دورہ کیا، آرمی چیف جنرل عاصم منیر نے ان کا استقبال کیا، صدر مملکت نے معرکہ حق میں کامیابی پر پیشہ ورانہ مہارت کی تعریف کی۔

آئی ایس پی آر کے مطابق صدر آصف علی زرداری کے گوجرانوالہ چھاؤنی کے دورے کے دوران وفاقی وزیر داخلہ محسن رضا نقوی بھی ان کے ہمراہ تھے۔ اس موقع پر منگلا اور گوجرانوالہ کور کے کمانڈرز بھی موجود تھے۔

ترجمان پاک فوج کے مطابق صدرِ پاکستان نے معرکہ حق آپریشن میں افواج کی کامیابی کو سراہا۔ صدر نے پاک فوج کی پیشہ ورانہ مہارت اور جرأت کو خراج تحسین پیش کیا۔

وطن کے دفاع میں شہید ہونیوالے فوجی و شہریوں کو صدر نے خراج عقیدت پیش کرتے ہوئے کہا کہ شہداء کی قربانیاں قومی وقار کا عظیم سرمایہ ہیں۔

آئی ایس پی آر کے مطابق صدر آصف علی زرداری نے افسروں اور جوانوں کے بلند حوصلے اور تیاری کو سراہا اورآپریشن بنیانُ المرصوص کی کامیابی پر مبارکباد پیش کی۔

 اس موقع پر صدر مملکت آصف علی زرداری نے کہا کہ شہدا کی قربانی مقدس امانت اور قوم کے لئے باعث فخر ہے، وطن کے بہادر سپوت دفاعِ وطن کے بے مثال حوصلے اور جنگی مہارت کے ساتھ دشمن کے ناپاک عزائم کو ناکام بناتے رہے۔

 تاریخ گواہی دے گی کہ افواج پاکستان نے چند گھنٹوں میں بے مثال درستگی اور عزم کے ساتھ دشمن کی جارحیت کو پسپا کیا انہوں نے کہا کہ مسلح افواج نے پاکستان کی قوت، مزاحمت اور قومی یکجہتی کا دوٹوک پیغام دیا۔

صدر مملکت نے فوجی افسروں اور جوانوں سے خطاب کرتے آپریشن “بنیان المرصوص” کی کامیاب تکمیل پر دل کی گہرائیوں سے مبارکباد دی اور کہا کہ  پاکستانی عوام بہادر افواج کو قومی عزت و خودمختاری کے اصل امین سمجھتے ہیں۔