میکسیکو کا امریکی ٹیرف پر جوابی اقدامات کا اعلان

میکسیکو کے صدر کلاڈیا شین بام (Claudia Sheinbaum) نے اعلان کیا ہے کہ اگر امریکہ کے ساتھ خاطر خواہ معاہدہ نہ ہوا تو ان کی حکومت آئندہ ہفتے امریکی ٹیرف کے خلاف جوابی اقدامات کا اعلان کرے گی۔

انہوں نے امریکی صدر ڈونلڈ ٹرمپ کی جانب سے سٹیل اور ایلومینیم پر عائد کیے گئے نئے ٹیرف کو غیر منصفانہ اور یکطرفہ اقدام قرار دیا۔

 صدر میکسیکو کا کہنا تھا کہ ان کی حکومت امریکی فیصلے سے پیدا ہونے والے تجارتی عدم توازن کو سنجیدگی سے لے رہی ہے اور ملکی مفادات کا ہر صورت میں تحفظ کیا جائے گا۔

انہوں نے کہا کہ مذاکرات کے دروازے کھلے ہیں تاہم اگر واشنگٹن سنجیدگی کا مظاہرہ نہ کرے تو ہم اپنے حقوق کے تحفظ کیلئے موثر اقدام کرنے پرمجبورہوں گے۔

واضح رہے کہ امریکہ نے کینیڈا اور میکسیکو سے درآمدات پر منگل سے 25 فی صد ٹیرف کی وصولی کا آغاز کر دیا ہے۔

امریکہ کے صدر ڈونلڈ ٹرمپ نے کہا تھا کہ کینیڈا اور میکسیکو کے خلاف تجارتی ٹیرف میں 25 فیصد اضافے کا نفاذ منگل کو شروع ہو جائے گا۔

یاد رہے کہ صدر ٹرمپ کاکہنا ہے کہ ٹیرف میں اضافے کا مقصد امریکہ کے دونوں ہمسایہ ملکوں پر دباو ڈالنا ہے کہ وہ طاقتور نشہ آور دوا فینٹینل کی امریکہ میں اسمگلنگ کو روکنے کے لیے موثر اقدامات کریں۔