مون سون بارشوں نے پنجاب کے بعد سندھ کا بھی رخ کر لیا ، جس کے بعد کراچی سمیت مختلف شہروں میں موسلادھار بارش کا سلسلہ شروع ہوگیا ہے ، بارش کے باعث نظامِ زندگی بری طرح متاثرہے۔
صبح سویرے کراچی میں موسلادھار بارش کے نتیجے میں متعدد علاقے زیرِ آب آ گئے، کراچی کے متاثرہ علاقوں میں سکیم 33، گڈاپ، گلستانِ جوہر، گلشنِ اقبال، شاہ فیصل کالونی، ایئرپورٹ کے اطراف، طارق روڈ، بلوچ کالونی اور دیگر علاقوں میں بارش کے بعد سڑکیں تالاب کا منظر پیش کرنے لگیں جبکہ متعدد علاقوں میں بجلی کی فراہمی بھی معطل ہو گئی۔
سندھ کے دیگر شہروں حیدرآباد، میرپور خاص، ٹھٹھہ، مکلی، سکھر، میرپور ماتھیلو، کندھ کوٹ، خیرپور ناتھن شاہ اور ہری پور میں موسلا دھار بارش ہوئی، جس سے سیلابی صورتحال پیدا ہو گئی ہے۔
بارش کے باعث ٹریفک کی روانی متاثر ہوئی ہے، کئی علاقوں میں شہری اپنے گھروں میں محصور ہو کر رہ گئے ہیں جبکہ امدادی اداروں کو بھی ریسکیو سرگرمیوں میں مشکلات کا سامنا ہے۔
ادھر سندھ حکومت نے مون سون بارشوں میں ممکنہ حادثات سے بچاؤ کے لیے اقدامات کرتے ہوئے بلدیاتی اداروں کے عملے کی چھٹیاں منسوخ کر دیں۔
سینئر وزیر سندھ شرجیل میمن کا کہنا ہے کہ نشیبی علاقوں میں ڈی واٹرنگ پمپس کی دستیابی یقینی بنانے کیلئے اقدامات کر لیے ہیں تاکہ نشیبی علاقوں سے بارشی پانی نکالا جا سکے۔
ان کا کہنا تھا کہ کراچی کے اولڈ سٹی ایریا میں 59 خطرناک عمارتوں کی نشاندہی کی گئی ہے، سندھ بلڈنگ کنٹرول اتھارٹی کی تکنیکی کمیٹی شہر بھر میں سروے کر رہی ہے، مقصد ایسی عمارتوں کا پتہ لگانا ہے جو شہریوں کیلئے خطرہ بن سکتی ہیں۔
ان کا یہ بھی کہنا تھا کہ انسانی جانوں کا تحفظ یقینی بنانے کیلئے 41 انتہائی خطرناک عمارتوں کو خالی کرا کے سیل کر دیا۔
محکمہ موسمیات کی آج ملک کے مختلف حصوں میں بارش کی پیشگوئی
محکمہ موسمیات نے آج سے سندھ، جنوبی پنجاب، کشمیر، شمال مشرقی، جنوبی بلوچستان، بالائی خیبر پختونخوا اور اسلام آباد میں تیز ہواؤں اور گرج چمک کے ساتھ بارش کا امکان ظاہر کیا ہے۔
اتوار کو روز جنوبی سندھ، مشرقی بلوچستان اور کشمیر میں چند مقامات پر موسلادھار بارش کا امکان ہے جبکہ ملک کے دیگر علاقوں میں گرم اور حبس رہنے کا امکان ہے۔ اسلام آباد اور گردونواح میں موسم مرطوب اور مطلع جزوی ابر آلود رہنے کا امکان ہے تاہم رات کے اوقات میں چند مقامات پر بارش ہو سکتی ہے۔
خیبر پختونخوا کے بیشتر اضلاع میں موسم گرم اور حبس رہنے کا امکان ہے تاہم دیر، سوات، کوہستان، مالاکنڈ، مانسہرہ، ایبٹ آباد، کرم اور وزیرستان میں مطلع جزوی ابر آلود رہنے کے علاوہ چند مقامات پر تیز ہواؤں اور گرج چمک کے ساتھ بارش کا امکان ہے۔
اسی طرح، پنجاب کے بیشتر اضلاع میں مطلع جزوی ابر آلود اور حبس رہنے کا امکان ہے۔ تاہم بہاولپور، رحیم یار خان، راجن پور، ڈی جی خان میں چند مقامات پر تیز ہواؤں اور گرج چمک کے ساتھ بارش کی توقع ہے جبکہ رات کے اوقات میں راولپنڈی، مری، گلیات، گجرنوالہ، سیالکوٹ، نارووال، لاہور اور گردونواح میں چند مقامات پر تیز ہواؤں اور گرج چمک کے ساتھ بارش ہو سکتی ہے۔
کشمیر اور گلگت بلتستان میں مطلع جزوی ابر آلود رہنے کے علاوہ تیز ہواؤں اور گرج چمک کے ساتھ بارش کا امکان ہے۔ اس دوران، کشمیر میں بعض مقامات پر موسلادھار بارش کی بھی توقع ظاہر کی گئی ہے۔
محکمہ موسمیات اور ڈیزاسٹر مینجمنٹ اتھارٹیز نے شہریوں سے اپیل کی ہے کہ وہ غیر ضروری طور پر گھروں سے نہ نکلیں، اور بارش کے دوران احتیاطی تدابیر اختیار کریں۔
By 
