بلوچستان واقعہ: خاتون اور مرد کو کتنی گولیاں لگیں؟ پوسٹ مارٹم رپورٹ سامنے آگئی

ویب ڈیسک۔ بلوچستان کے صوبائی دارالحکومت کوئٹہ کے نواحی علاقے مارگٹ میں غیرت کے نام پر قتل کیے گئے مرد اور خاتون کی پوسٹ مارٹم رپورٹ سامنے آگئی ہے، جس کے مطابق خاتون کو 7 اور مرد کو 9 گولیاں ماری گئیں۔

دوسری جانب قتل کیے گئے دونوں افراد کی قبر کشائی کی گئی، اور ان کی باقیات اسپتال منتقل کردی گئیں۔ اب ان کے نمونوں کا ڈی این اے ٹیسٹ اور نادرا سے تصدیق کرانے کا فیصلہ کیا گیا ہے۔

پولیس سرجن ڈاکٹر عائشہ فیض کے مطابق مرد اور خاتون کی قبر کشائی کے بعد پوسٹ مارٹم کیا گیا۔ یہ دونوں افراد 4 جون 2025 کو قتل کیے گئے تھے۔ خاتون کی عمر تقریباً 37 سے 38 سال بتائی گئی ہے، جس کے سر پر ایک گولی جبکہ سینے اور پیٹ پر مجموعی طور پر 7 گولیاں ماری گئیں۔ خاتون کے بازو پر “نور بانو بی بی” لکھا ہوا تھا اور اس کا تعلق ساتکزئی قبیلے سے تھا۔

یہ بھی پڑھیں: بلوچستان نیشنل پارٹی کے سربراہ سردار اختر مینگل کو بیرون ملک جانے سے روک دیا گیا

مرد کی شناخت احسان اللہ کے نام سے ہوئی ہے، جس کی عمر 35 سے 36 سال کے لگ بھگ ہے، اور اسے سینے اور پیٹ میں 9 گولیاں ماری گئی تھیں۔

ڈاکٹر عائشہ فیض کے مطابق، خاتون کی لاش خراب ہوچکی تھی جبکہ مرد کی لاش کی حالت نسبتاً بہتر تھی۔ غیرت کے نام پر قتل ہونے والی خاتون کو ڈیگاری قادر بخش کول مائنز قبرستان اور مرد کو سنجدی قبرستان میں دفنایا گیا تھا۔