وزیر اعظم کا وادی تیراہ میں خوارج کی فائرنگ سے معصوم اور پر امن شہریوں کی شہادت پر اظہار افسوس

وزیرِ اعظم شہباز شریف نے وادیٔ تیراہ کے علاقے باغ میدان میں خوارج کی اندھا دھند فائرنگ کے نتیجے میں بے گناہ، معصوم اور پُرامن شہریوں کی شہادت پر گہرے دکھ اور افسوس کا اظہار کیا ہے۔

انہوں نے اس سانحے کو ایک بزدلانہ اور انسانیت سوز اقدام قرار دیتے ہوئے متاثرہ خاندانوں سے دلی ہمدردی کا اظہار کیا ہے۔

وزیرِ اعظم نے زخمیوں کو فوری طور پر مکمل طبی امداد فراہم کرنے کی ہدایات جاری کرتے ہوئے متعلقہ اداروں کو ہنگامی اقدامات کی تلقین کی ہے تاکہ کسی بھی زخمی کی جان ضائع نہ ہو۔

یہ  خبر بھی پڑھیں :آئی جی ایف سی نارتھ میجر جنرل راؤ عمران کی وادی تیراہ میں خوارج کی فائرنگ سے زخمی ہونیوالوں کی عیادت

اپنے بیان میں وزیرِ اعظم نے خوارج کی طرف سے پُرامن شہریوں کو نشانہ بنانے کی شدید الفاظ میں مذمت کرتے ہوئے کہا کہ دہشت گردی کی یہ بزدلانہ کارروائیاں ہمارے عزم کو متزلزل نہیں کر سکتیں۔ انہوں نے واضح کیا کہ پاکستانی قوم اور ریاست اپنے شہداء کے لہو کو رائیگاں نہیں جانے دے گی۔

وزیرِ اعظم نے کہا کہ دہشت گرد عناصر اور ان کے سہولت کاروں کو کیفر کردار تک پہنچایا جائے گا۔ اُن کا کہنا تھا کہ ہم دہشت گردوں اور دہشت گردی کو منطقی انجام تک پہنچا کر دم لیں گے  اور پاکستان کو پائیدار امن کا گہوارہ بنانے کے مشن سے ایک انچ پیچھے نہیں ہٹیں گے۔