پاک افغان کشیدگی: چمن میں عوام بڑی تعداد میں افواج پاکستان کی حمایت میں باہر اگئی ، افواج پاکستان کے حق میں نعرے

پاک افغان کشیدگی کے پس منظر میں بلوچستان کے شہر چمن میں عوام کی بڑی تعداد افواجِ پاکستان کی حمایت میں سڑکوں پر نکل آئی اور ریلی نکال کر یکجہتی کا اظہار کیا۔ ریلی میں شہریوں، قبائلی عمائدین، نوجوانوں اور مختلف سماجی حلقوں سے تعلق رکھنے والے افراد نے بڑی تعداد میں شرکت کی۔

مظاہرین نے شہر کی مختلف شاہراہوں پر مارچ کرتے ہوئے افواجِ پاکستان کے حق میں نعرے لگائے اور ملکی سلامتی کے لیے سکیورٹی فورسز کی قربانیوں کو خراجِ تحسین پیش کیا۔ شرکاء کا کہنا تھا کہ پاکستان کی مسلح افواج ملک کی سرحدوں کے دفاع اور قومی سلامتی کے تحفظ کے لیے ہر وقت تیار ہیں اور پوری قوم اپنی فوج کے ساتھ کھڑی ہے۔

ریلی کے شرکاء نے اس موقع پر بینرز اور پلے کارڈز بھی اٹھا رکھے تھے جن پر افواجِ پاکستان کے ساتھ اظہارِ یکجہتی اور ملکی دفاع کے حوالے سے نعرے درج تھے۔ مقررین نے خطاب کرتے ہوئے کہا کہ موجودہ حالات میں قومی اتحاد اور یکجہتی کی ضرورت پہلے سے زیادہ ہے۔

یہ بھی پڑھیں؛ نوکنڈی میں آئی جی ایف سی بلوچستان (ساؤتھ) کی زیر صدارت عوامی جرگے کا انعقاد، سیکیورٹی صورتحال اور بارڈر امور پر تبادلہ خیال

مقررین کا مزید کہنا تھا کہ چمن کے عوام ملک کی سلامتی اور استحکام کے لیے اپنی افواج کے شانہ بشانہ کھڑے ہیں اور کسی بھی بیرونی دباؤ یا جارحیت کا ڈٹ کر مقابلہ کرنے کے لیے پوری قوم متحد ہے۔

ریلی کے اختتام پر شرکاء نے ملکی امن، استحکام اور سرحدوں کی حفاظت کے لیے خصوصی دعا بھی کی۔