امریکہ کا ایران میں زمینی فوج بھیجنے کا منصوبہ، امریکی میڈیا کا بڑا انکشاف

امریکی نشریاتی ادارے ‘سی بی ایس’ (CBS) نے آج 21 مارچ کی صبح اپنی ایک خصوصی رپورٹ میں سنسنی خیز انکشاف کیا ہے کہ امریکی فوجی حکام نے ایران کے اندر زمینی فوج بھیجنے اور وہاں موجود جوہری مواد کو تحویل میں لینے کا تفصیلی منصوبہ تیار کر لیا ہے۔

تفصیلات کے مطابق اس امریکی میڈیا میڈیا آؤٹ لیٹ سی بی ایس نے دعویٰ کیا ہے کہ اس منصوبے پر عملدرآمد کا تمام تر دارومدار صدر ڈونلڈ ٹرمپ کے فیصلے پر ہے، جو اس وقت تہران کے خلاف جاری فوجی مہم کو منطقی انجام تک پہنچانے کے لیے مختلف آپشنز پر غور کر رہے ہیں۔

رپورٹ کے مطابق اس ممکنہ فوجی کارروائی کا بنیادی مقصد ایران کے پاس موجود 972 پاؤنڈ (60 فیصد افزودہ) یورینیم کے ذخیرے کو تلاش کر کے وہاں سے نکالنا ہے۔ وائٹ ہاؤس اور پینٹاگون کے مبہم اشاروں سے ظاہر ہوتا ہے کہ امریکہ اب صرف فضائی حملوں تک محدود نہیں رہنا چاہتا بلکہ براہِ راست اس مواد پر قبضہ کرنا چاہتا ہے تاکہ ایران کو ایٹمی ہتھیار بنانے سے مستقل طور پر روکا جا سکے۔

ذرائع کا کہنا ہے کہ اس انتہائی حساس مشن کی منصوبہ بندی ‘جوائنٹ اسپیشل آپریشنز کمانڈ’ (JSOC) کے سپرد کی گئی ہے۔ یہ وہی ایلیٹ یونٹ ہے جو دنیا بھر میں “انسدادِ پھیلاؤ” (Counter-proliferation) کے پیچیدہ مشن انجام دینے کی شہرت رکھتا ہے۔ اس آپریشن میں ایرانی فورسز کو حراست میں لینے اور جوہری سلنڈرز کو محفوظ طریقے سے منتقل کرنے کی حکمتِ عملی پر بھی تبادلہ خیال کیا گیا ہے۔

“ہم اپنے مقاصد کو پورا کرنے کے بہت قریب پہنچ گئے ہیں کیونکہ ہم ایران کی دہشت گرد حکومت کے حوالے سے مشرق وسطیٰ میں اپنی عظیم فوجی کوششوں کو ختم کرنے پر غور کر رہے ہیں۔” اگرچہ وائٹ ہاؤس نے براہِ راست تبصرے سے گریز کیا ہے، تاہم پریس سکریٹری کیرولین لیویٹ نے تصدیق کی ہے کہ ایران کے اندر جا کر مواد نکالنے کا آپشن “میز پر موجود” ہے۔

گزشتہ تین ہفتوں سے جاری اس لڑائی میں اب تک ایران کے فضائی دفاع، میزائل سسٹمز اور پاسدارانِ انقلاب کے بنیادی ڈھانچے کو نشانہ بنایا گیا ہے۔ اس دوران: مختلف حملوں اور حادثات میں اب تک 13 امریکی فوجی ہلاک ہو چکے ہیں (6 کویت میں، 1 سعودی عرب میں اور 6 عراق میں طیارہ حادثے کے دوران)۔

شدید بمباری کے باوجود ایران نے خلیجی خطے میں امریکی و اسرائیلی اتحادیوں پر جوابی حملے کیے ہیں اور آبنائے ہرمز میں تجارتی جہاز رانی کو متاثر کر کے خام تیل کی ترسیل روک دی ہے۔