یورپی ملک پولینڈ نے مشرقِ وسطیٰ میں جاری کشیدگی کے دوران اپنا جدید ترین ’پیٹریاٹ میزائل ڈیفنس سسٹم‘ وہاں بھیجنے سے صاف انکار کر دیا ہے۔ پولینڈ کی حکومت کے اس فیصلے نے عالمی سطح پر خطے کی سیکیورٹی صورتحال اور دفاعی ترجیحات پر ایک نئی بحث چھیڑ دی ہے۔
غیر ملکی میڈیا رپورٹس کے مطابق، پولینڈ کی اعلیٰ قیادت نے واضح کیا ہے کہ وہ موجودہ حالات میں اپنے دفاعی نظام کو کسی دوسرے خطے میں منتقل کرنے کا خطرہ مول نہیں لے سکتے۔
پولینڈ کے وزیرِ دفاع نے ایک پالیسی بیان جاری کرتے ہوئے کہا کہ ’پیٹریاٹ بیٹریاں اور اس سے متعلقہ جدید اسلحہ اس وقت پولینڈ کی فضائی حدود کے تحفظ اور نیٹو کے مشرقی محاذ کے دفاع کے لیے ریڑھ کی ہڈی کی حیثیت رکھتے ہیں، لہٰذا انہیں ملک سے باہر بھیجنا قومی سلامتی پر سمجھوتہ کرنے کے مترادف ہوگا‘۔
یہ اہم فیصلہ ایک ایسے وقت میں سامنے آیا ہے جب پولینڈ مشرقی یورپ میں بدلتی ہوئی جغرافیائی صورتحال کے باعث اپنی سیکیورٹی اور نیٹو کے دفاعی ڈھانچے کو مزید مضبوط کرنے پر توجہ مرکوز کیے ہوئے ہے۔
ماہرینِ دفاع کا کہنا ہے کہ پولینڈ کے اس سخت موقف سے مشرقِ وسطیٰ میں موجود ان ممالک کی عسکری منصوبہ بندی پر گہرا اثر پڑ سکتا ہے جو فضائی دفاع کے لیے مغربی اتحادیوں کے مرہونِ منت ہیں۔
واضح رہے کہ پولینڈ کا یہ انکار اس بات کی نشاندہی کرتا ہے کہ 2026 میں یورپی ممالک اپنی سرحدوں کے دفاع کو پہلی ترجیح دے رہے ہیں۔ اس اقدام سے جہاں مشرقِ وسطیٰ میں سیکیورٹی چیلنجز میں اضافے کا خدشہ ہے، وہی نیٹو کے اندرونی دفاعی اشتراک پر بھی سوالات اٹھ رہے ہیں۔
عالمی برادری اس صورتحال پر گہری نظر رکھے ہوئے ہے کہ آیا پولینڈ کے اس فیصلے کے بعد مشرقِ وسطیٰ کے لیے متبادل دفاعی انتظامات کیا ہوں گے۔
By 
