الیکٹرک بائیک خریدنے والوں کیلئے بری خبر ، قیمتوں میں بڑا اضافہ

الیکٹرک بائیک بنانے والی کمپنی نے بڑھتے ہوئے آپریشنل اخراجات اور حالیہ پیٹرولیم مصنوعات کی قیمتوں میں اضافے کے باعث اپنی ای بائیکس کی قیمتوں میں اضافہ کر دیا ہے۔

کمپنی کی جانب سے جاری کردہ ایک سرکاری بیان میں کہا گیا ہے کہ سمندری ترسیل کے بڑھتے ہوئے اخراجات، کراچی پورٹ سے مینوفیکچرنگ پلانٹس تک لاجسٹکس کی بڑھتی لاگت، اور ڈیلرشپس تک گاڑیاں پہنچانے کے اضافی اخراجات نے مجموعی قیمتوں میں اضافے میں اہم کردار ادا کیا ہے۔

 پیٹرولیم مصنوعات کی قیمتوں میں حالیہ اضافے نے کمپنی کے بجٹ پر شدید دباؤ ڈالا ہے، جس کے باعث ان اضافی اخراجات کو اندرونی طور پر برداشت کرنا ممکن نہیں رہا۔

یہ بھی پڑھیں:موٹر سائیکل سوار سستا پیٹرول لینے کے لیے کیسے رجسٹر ہوں؟کون سی ایپ استعمال کریں؟مکمل طریقہ جانیے

نتیجتاً، میٹرو ای وہیکلز کے تمام ماڈلز کی قیمت میں فوری طور پر 5,000 روپے کا اضافہ کر دیا گیا ہے۔ یہ نئی قیمتیں 3 اپریل کے بعد کیے جانے والے تمام آرڈرز پر لاگو ہوں گی، جبکہ ڈیلرز کو ہدایت دی گئی ہے کہ وہ موجودہ قیمت کے ساتھ اضافی رقم بھی وصول کریں۔

 اس سے قبل وفاقی حکومت نے پیٹرولیم مصنوعات کی قیمتوں میں نمایاں اضافہ کیا تھا، جس کے تحت پیٹرول کی قیمت 458.41 روپے فی لیٹر اور ہائی اسپیڈ ڈیزل (HSD) کی قیمت 520.35 روپے فی لیٹر مقرر کی گئی تھی۔