نیویارک میئر ظہران ممدانی نے ایران پر امریکا اور اسرائیل کے فوجی حملوں کو غیر قانونی جارحیت قرار دیتے ہوئے سخت ردعمل دیا ہے اور کہا ہے کہ جنگ کسی صورت قابل قبول نہیں ہے۔
سماجی رابطے کی ویب سائٹ ایکس پر جاری اپنے تفصیلی پیغام میں انہوں نے کہا کہ ایران پر کیے گئے حملے ایک غیر قانونی جنگی مہم میں خطرناک حد تک اضافے کے مترادف ہیں، جس کے نتائج نہ صرف خطے بلکہ پوری دنیا کے امن کے لیے تباہ کن ہو سکتے ہیں۔ ان کا کہنا تھا کہ شہروں پر بمباری اور نہتے شہریوں کا قتل عام کسی بھی بین الاقوامی قانون اور انسانی اقدار کے منافی ہے۔
انہوں نے واضح کیا کہ ایک نئے محاذ کا کھلنا عالمی کشیدگی میں مزید اضافہ کرے گا اور اس کا براہ راست اثر عام شہریوں پر پڑے گا۔ ان کے مطابق امریکا کے عوام حکومت کی تبدیلی کے لیے ایک اور جنگ نہیں بلکہ امن، استحکام اور سفارتی حل چاہتے ہیں۔
میئر نے کہا کہ عالمی تنازعات کا حل طاقت کے استعمال میں نہیں بلکہ مذاکرات اور بین الاقوامی قوانین کی پاسداری میں پوشیدہ ہے۔ انہوں نے عالمی برادری پر زور دیا کہ وہ فوری جنگ بندی اور کشیدگی میں کمی کے لیے کردار ادا کرے۔
نیویارک میں سیکیورٹی سخت
نیویارک کے میئر نے شہر میں سیکیورٹی سخت کرنے کا اعلان کرتے ہوئے بتایا کہ وہ مسلسل نیویارک پولیس کے کمشنر اور نیویارک سٹی ایمرجنسی مینجمنٹ کے حکام سے رابطے میں ہیں۔ حساس مقامات پر گشت میں اضافہ کر دیا گیا ہے اور نگرانی کے نظام کو مزید فعال بنایا جا رہا ہے۔
انہوں نے کہا کہ ایرانی نژاد شہری نیویارک کے معاشرتی اور معاشی ڈھانچے کا اہم حصہ ہیں اور کسی بھی قسم کی نفرت انگیزی یا تعصب کو برداشت نہیں کیا جائے گا۔ شہریوں کے جان و مال کا تحفظ اولین ترجیح ہے اور ہر ممکن اقدام اٹھایا جائے گا۔
عالمی سطح پر تشویش
ظہران ممدانی کے اس بیان سے واضح ہوتا ہے کہ امریکی داخلی سیاست میں بھی بیرونی عسکری کارروائیوں کے حوالے سے شدید اختلاف پایا جاتا ہے۔ انسانی حقوق کے حلقوں نے بھی ممکنہ شہری نقصانات پر گہری تشویش ظاہر کی ہے اور فوری جنگ بندی کا مطالبہ کیا ہے۔
ظہران ممدانی نے اپنے پیغام کے اختتام پر کہا کہ جنگ کبھی مسئلے کا حل نہیں رہی، وقت آ گیا ہے کہ طاقت کی سیاست کے بجائے مکالمے اور امن کو ترجیح دی جائے۔
By 
