بیرون ملک جانے والے شہریوں کے لئے بڑی خبر

ڈائریکٹر ایف آئی اے لاہور زون کیپٹن ریٹائرڈ علی ضیاء نے کہا ہے کہ بیرون ملک سفر کرنے والے پاکستانی شہری بلا خوف و خطر ایئرپورٹس پر پہنچ سکتے ہیں۔ انہوں نے یہ بات نیوز کانفرنس کے دوران کہی اور کہا کہ حال ہی میں آف لوڈ ہونے والے مسافروں کے حوالے سے پھیلائی جانے والی خبریں بالکل بے بنیاد ہیں۔

ڈائریکٹر ایف آئی اے نے عوام سے اپیل کی کہ وہ افواہوں اور پروپیگنڈے سے متاثر نہ ہوں اور بلاوجہ پریشان نہ ہوں۔ ان کا کہنا تھا کہ روزانہ تقریباً 60 سے 70 ہزار مسافر مختلف ایئرپورٹس سے بیرون ملک روانہ ہوتے ہیں اور ان میں سے ڈی پورٹ ہونے والے مسافروں کی شرح صرف 0.6 فیصد ہے۔ صرف وہی مسافر آف لوڈ کیے جاتے ہیں جن کے پاس مطلوبہ اور قانونی دستاویزات موجود نہ ہوں۔

یہ بھی پڑھیں: پاکستان کے لیے خطرے کی گھنٹی، امریکی اخبار واشنگٹن پوسٹ کا بھارت، افغانستان کے کٹھ جوڑ سے متعلق بڑا انکشاف

علی ضیاء نے مزید بتایا کہ ایئرپورٹس پر ہر مسافر کے ساتھ مکمل تعاون کیا جاتا ہے اور جہاں دستاویزات میں کوئی کمی یا اعتراض ہو، ان مسافروں کو ہی آف لوڈ کیا جاتا ہے۔ انہوں نے کہا کہ بعض افراد بیرون ملک جا کر بھیک مانگنے کی کوشش کرتے ہیں، اس لیے متعلقہ دستاویزات کی جانچ اور آف لوڈ کرنا ضروری ہے تاکہ غیر قانونی سرگرمیوں کو روکا جا سکے۔

ڈائریکٹر ایف آئی اے لاہور زون نے واضح کیا کہ قوانین کے مطابق جائز اور مکمل دستاویزات رکھنے والے مسافر بلاخوف و خطر سفر کر سکتے ہیں اور ایئرپورٹس پر ان کے ساتھ کسی قسم کی غیر ضروری دشواری نہیں ہوگی۔ انہوں نے عوام سے درخواست کی کہ وہ افواہوں کی بنیاد پر پریشان نہ ہوں اور اپنی سفری تیاری کے دوران ضروری دستاویزات کا مکمل انتظام کریں۔

یہ بھی پڑھیں: ایف آئی اے نے نیشنل سائبر کرائم ایجنسی کے ایڈیشنل ڈائریکٹر چوہدری سرفراز سمیت چار افسران کو گرفتار کرلیا