پنجاب میں اساتذہ کی بھرتیوں کا شیڈول تبدیل، اہم تفصیلات سامنے آگئیں

پنجاب حکومت نے اسکول ٹیچر انٹرن بھرتی کے شیڈول میں اہم تبدیلی کرتے ہوئے میرٹ لسٹ کی جاری کرنے کی تاریخ، انٹرویو کے مراحل اور حتمی سلیکشن کے نئے اوقات کار جاری کر دیے ہیں۔ اسکول ایجوکیشن ڈیپارٹمنٹ کی جانب سے صوبے بھر کے تمام اضلاع کو منگل کے روز نئی ٹائم لائن فراہم کی گئی، جس میں بھرتی کے ہر مرحلے کو زیادہ منظم اور بہتر مانیٹرنگ کے قابل بنانے کی ہدایات شامل ہیں۔

محکمے کے جاری کردہ اعلامیے کے مطابق نیا شیڈول اس مقصد کے تحت ترتیب دیا گیا ہے کہ امیدواروں کو میرٹ لسٹ سے لے کر انٹرویو اور فائنل سلیکشن تک ہر مرحلے میں مکمل شفافیت اور سہولت فراہم کی جا سکے۔ اس سلسلے میں پنجاب کے تمام سرکاری اسکول 3 دسمبر کو ابتدائی میرٹ لسٹ آویزاں کریں گے، جس کے بعد امیدوار اپنی حیثیت اور میرٹ پر پوزیشن معلوم کر سکیں گے۔

میرٹ لسٹ پر کسی بھی اعتراض کی صورت میں امیدوار 4 اور 5 دسمبر کو مقررہ تحصیل سطح کے دفاتر میں اپنی درخواست جمع کرا سکیں گے۔ محکمے کے مطابق اعتراضات کو وہیں موقع پر سن کر حل کیا جائے گا تاکہ بھرتی کے عمل میں غیر ضروری تاخیر نہ ہو اور شفافیت برقرار رہے۔

شارٹ لسٹ ہونے والے امیدواروں کے انٹرویوز 6 اور 7 دسمبر کو لیے جائیں گے۔ ان انٹرویوز کے دوران امیدواروں کی تدریسی صلاحیت، تعلیمی کارکردگی، رابطہ مہارت اور مختلف اسکولز کے لیے موزونیت کا تفصیلی جائزہ لیا جائے گا۔

یہ بھی پڑھیں: اسکول ٹیچرز انٹرنز کی بھرتی کیلئے درخواستیں جمع کروانے کی تاریخ میں توسیع

حکام نے تصدیق کی ہے کہ حتمی میرٹ لسٹ 8 دسمبر کو اسکولوں کے نوٹس بورڈز کے علاوہ سرکاری ایس ٹی آئی آن لائن پورٹل پر بھی جاری کر دی جائے گی۔ کامیاب امیدوار 9 دسمبر کو اپنی تقرری کے آرڈرز ڈاؤن لوڈ کر سکیں گے، جو بھرتی کے عمل کا آخری مرحلہ ہوگا۔

اسکول ایجوکیشن ڈیپارٹمنٹ نے تمام اسکول سربراہان، ضلعی حکام اور امیدواروں کو ہدایت کی ہے کہ وہ نئے شیڈول پر مکمل عمل درآمد یقینی بنائیں تاکہ بھرتی کا عمل منظم، شفاف اور کسی بھی رکاوٹ کے بغیر مکمل کیا جا سکے۔