فیلڈ مارشل سید عاصم منیر ملک کے پہلے چیف آف ڈیفنس فورسز بن گئے

صدر مملکت آصف علی زرداری نے وزیراعظم شہباز شریف کی سفارش پر فیلڈ مارشل سید عاصم منیر کی بطور آرمی چیف اور چیف آف ڈیفنس فورسز تقرری کی  منظوری دے دی ہے۔

صدر مملکت کی منظوری کے بعد فیلڈ مارشل سید عاصم منیر کی تقرری کا باضابطہ نوٹیفکیشن جاری کردیا گیا ہے۔ فیلڈ مارشل سید عاصم منیر ملک کے پہلے چیف آف ڈیفنس فورسز بن گئے ہیں ۔ یہ تعیناتی پانچ سال کے لیے کی گئی ہے اور فیلڈ مارشل سید عاصم منیر دسمبر 2030 تک چیف آف ڈیفنس فورسز کے عہدے پر تعینات رہیں گے۔

صدر مملکت کے وزیراعظم شہباز شریف کی سفارش پر چیف آف ایئر اسٹاف، ائیر چیف مارشل ظہیر احمد بابر سدھو کی مدتِ ملازمت میں بھی دو سال کی توسیع کی منظوری دے دی ہے۔ اس توسیع کا اطلاق ان کی موجودہ پانچ سالہ مدتِ ملازمت کے مارچ 2026 میں مکمل ہونے پر ہوگا۔

یہ بھی پڑھیں: بین الاقوامی مارکیٹ تک رسائی کے لیے کرغزستان کو پاکستانی بندرگاہیں دینے کے لیے تیار ہیں، وزیراعظم شہباز شریف

فیلڈ مارشل سید عاصم منیر کے کیئرئیر پر ایک نظر

فیلڈ مارشل سید عاصم منیر نے اپنے فوجی کیریئر کا آغاز 1986 میں او ٹی ایس منگلا سے کیا۔ انہوں نے کمیشن فرنٹیئر فورس رجمنٹ میں حاصل کیا۔ بطور کیڈٹ ان کی بہترین کارکردگی کے اعتراف میں انہیں اعزازی شمشیر سے نوازا گیا، جو تربیت کے دوران اعلیٰ صلاحیتوں کا اعتراف ہوتا ہے۔

ان کی ملٹری تربیت اور تعلیم مختلف اہم عسکری اداروں میں ہوئی، جنہوں نے ان کی پیشہ ورانہ ترقی میں بنیادی کردار ادا کیا۔ فوج میں پیش قدمی کے دوران انہیں کئی اہم عہدوں پر خدمات انجام دینے کا موقع ملا۔

25 اکتوبر 2018 کو انہیں ڈائریکٹر جنرل انٹر سروسز انٹیلی جنس (ڈی جی آئی ایس آئی) تعینات کیا گیا۔ بعد ازاں 17 جون 2019 کو وہ کور کمانڈر گوجرانوالہ تعینات ہوئے۔

ان کا شمار ان افسران میں ہوتا ہے جنہوں نے مختلف نوعیت کے انتظامی اور عملی عسکری عہدوں پر خدمات انجام دیں۔ اسی سلسلے میں انہوں نے کوارٹر ماسٹر جنرل کے طور پر بھی فرائض سرانجام دیے۔

29 نومبر 2022 کو سید عاصم منیر کو چیف آف آرمی اسٹاف مقرر کیا گیا۔ ان کی قیادت میں پاکستان نے بھارت کو ایک بدترین اور تاریخی شکست سے دوچار کیا، جس کے بعد انہیں فیلڈ مارشل کے اعزاز سے نوازا گیا۔