پنجاب حکومت کا ون ڈش اور لاؤڈ اسپیکر کی خلاف ورزی پر کریک ڈاؤن کا فیصلہ

پنجاب حکومت نے صوبے بھر میں ون ڈش پابندی کی خلاف ورزی اور لاؤڈ اسپیکر کے غیر ضروری استعمال کے خلاف وسیع پیمانے پر کریک ڈاؤن  کا فیصلہ کر لیا ہے۔

 وزیراعلیٰ مریم نواز شریف نے تمام کمشنرز اور ڈپٹی کمشنرز کو ہدایات جاری کی ہیں کہ شادیوں اور دیگر تقریبات میں ون ڈش پابندی ہر صورت یقینی بنائی جائے۔

وزیراعلیٰ نے شادی ہالز اور تقریبات میں بلند آواز میوزک پر بھی سخت کارروائی کی ہدایت دیتے کہا ہے کہ قوالی نائٹس یا کسی بھی تقریب میں لاؤڈ اسپیکر کے غیر قانونی استعمال پر فوری قانونی کارروائی کی جائے۔

یہ بھی پڑھیں :زندہ دلان لاہور بسنت کب منائیں گے ؟ فیصلہ ہوگیا

حکام کے مطابق اب فارم ہاؤسز اور اوپن ایریاز میں بھی شادی ہالز کی طرح لاؤڈ اسپیکر کے غیر قانونی استعمال پر پابندی کی جائے گی اور ون ڈش پالیسی پر عملدرآمد لازمی قرار دیا جائے گا۔

شادی ہالز کے مقررہ اوقات کار کی بھی سخت مانیٹرنگ کی جائے گی تاکہ تقریبات میں نظم و ضبط برقرار رہے،  حکام نے واضح کیا ہے کہ ون ڈش یا لاؤڈ اسپیکر کی خلاف ورزی کی صورت میں سرکاری افسران کو ایسی تقریبات میں شرکت کی اجازت نہیں ہوگی۔

حکومتی اقدامات کا مقصد صوبے میں شور کی آلودگی اور فضول خرچی کے خاتمے کے ساتھ ساتھ شادی تقریبات میں نظم و ضبط کو یقینی بنانا ہے، یہ اقدامات عوامی سکون اور رہائشی علاقوں میں شور کی حد سے تجاوز کو روکنے کے لیے بھی ضروری قرار دیے گئے ہیں۔

یہ بھی پڑھیں : پنجاب حکومت نے موسم سرما کی چھٹیوں کا نوٹیفکیشن جاری کردیا

پنجاب حکومت کی جانب سے اٹھائے گئے یہ اقدامات اس بات کا عندیہ ہیں کہ شادیوں اور دیگر تقریبات میں نہ صرف قانون کی پاسداری کی جائے گی بلکہ شور اور غیر قانونی سرگرمیوں پر قابو پانے کے لیے بھی سخت رویہ اختیار کیا جائے گا، تاکہ عوامی ماحول پرسکون اور محفوظ رہ سکے۔