موٹروے پولیس نے بڑی شاہراہوں کے لیے ایڈوائزری جاری کر دی

نیشنل ہائی ویز اینڈ موٹروے پولیس نے دھند کے موسم کے لیے خصوصی ٹریول ایڈوائزری جاری کر دی جس میں کہا گیا ہے کہ قومی شاہراہوں پر ڈرائیورز کی حدِ نگاہ میں نمایاں کمی واقع ہوتی ہے، جس کے باعث حادثات کا خدشہ بڑھ جاتا ہے۔

،تفصیلاات کے مطابق موٹر وے پولیس نے شہریوں سے اپیل کی ہے کہ وہ دھند کے موسم میں صبح 10 بجے سے رات 8 بجے کے درمیان سفر مکمل کریں اور حتی الامکان رات کے سفر سے گریز کریں ، تاکہ موٹروے کی ممکنہ بندش کی صورت میں پیش آنے والی مشکلات سے بچا جا سکے۔

نیشنل ہائی ویز اینڈ موٹروے پولیس نے پنجاب، خیبر پختونخوا اور سندھ کے مختلف علاقوں میں شدید دھند پڑنے کے پیشِ نظر مسافروں کیلئے تفصیلی ٹریول ایڈوائزری جاری کر دی ہے۔

ترجمان موٹروے پولیس کے مطابق دھند کے باعث حدِ نگاہ انتہائی کم ہونے سے قومی شاہراہوں اور موٹروے پر حادثات کا خطرہ کئی گنا بڑھ جاتا ہے۔

مزید پڑھیں: شدید دھند کے باعث لاہور، پشاور موٹر ویز کے اہم حصے بند، شہریوں کے لیے اہم انتباہ جاری

شدید دھند کی صورت میں متعلقہ موٹروے سیکشنز کو مسافروں کی حفاظت کیلئے عارضی طور پر بند کیا جا سکتا ہے۔ مسافروں سے گزارش کی گئی ہے کہ صبح 10 بجے سے شام 8 بجے کے درمیان ہی سفر مکمل کریں اور رات کے وقت غیر ضروری سفر سے مکمل گریز کریں۔

سفر کے دوران ڈرائیور حضرات اپنی گاڑیوں میں فوگ لائٹس کا استعمال لازمی کریں، وائپرز درست حالت میں رکھیں، اگلی گاڑی سے معمول سے زیادہ فاصلہ رکھیں اور ہائی بیم لائٹس کا استعمال ہرگز نہ کریں کیونکہ اس سے حدِ نگاہ مزید کم ہو جاتی ہے۔

ترجمان کے مطابق مسافر سفر شروع کرنے سے قبل تازہ ترین صورتحال جاننے کیلئے ہیلپ لائن نمبر 130، ایف ایم 95 ریڈیو اور سوشل میڈیا استعمال کریں۔ @nhmp

ترجمان موٹروے پولیس نے کہا کہ عوام کی جانیں اور مال محفوظ رکھنا ہماری اولین ترجیح ہے۔ موٹروے پولیس کی ٹیمیں 24 گھنٹے چوکس ہیں اور ہر ممکن اقدامات کیے جا رہے ہیں۔