سکولز اور کالجز میں موسمِ سرما کی تعطیلات کا باضابطہ اعلان

سندھ بھر کے سرکاری و نجی اسکولوں اور کالجوں میں موسمِ سرما کی تعطیلات کا باضابطہ اعلان کر دیا گیا ہے۔

محکمۂ تعلیم سندھ کے ترجمان کے مطابق کراچی سمیت پورے صوبے کے تعلیمی ادارے 22 دسمبر سے 31 دسمبر تک بند رہیں گے۔ ترجمان نے مزید بتایا کہ تعطیلات کے بعد یکم جنوری 2026 سے تمام سرکاری و نجی تعلیمی اداروں میں معمول کے مطابق تدریسی سرگرمیوں کا آغاز کر دیا جائے گا۔

محکمہ تعلیم کے مطابق تعطیلات کے دوران بورڈ کے ضمنی امتحانات اپنے طے شدہ شیڈول کے مطابق جاری رہیں گے، اس لیے امیدواروں کو اس سلسلے میں کسی تبدیلی کا سامنا نہیں کرنا پڑے گا۔

دوسری جانب پنجاب حکومت بھی صوبے بھر کے سرکاری اور نجی اسکولوں میں موسمِ سرما کی تعطیلات کا اعلان کر چکی ہے۔ صوبائی وزیرِ تعلیم رانا سکندر حیات نے سماجی رابطے کی ویب سائٹ ایکس (سابق ٹوئٹر) پر جاری بیان میں بتایا کہ پنجاب کے تمام اسکول 22 دسمبر 2025 سے 10 جنوری 2026 تک موسمِ سرما کی تعطیلات کے سلسلے میں بند رہیں گے۔

وزیرِ تعلیم کے مطابق یہ فیصلہ سردی کی شدت، ماہرین کی آراء اور والدین و اساتذہ کی مشاورت کے بعد کیا گیا ہے تاکہ بچوں کی صحت کا بہتر طور پر خیال رکھا جا سکے۔ جاری کردہ سرکاری اعلامیے میں واضح کیا گیا کہ تعطیلات کے دوران پرائمری، مڈل، ہائی اور ہائر سیکنڈری سمیت تمام تعلیمی اداروں میں تدریسی سرگرمیاں معطل رہیں گی۔

یہ بھی پڑھیں: ایک ساتھ 2 چھٹیاں، سکول،دفاتر اور سرکاری ادارے بند رہیں گے

محکمہ تعلیم پنجاب نے اس حوالے سے باقاعدہ نوٹیفکیشن متعلقہ ڈسٹرکٹ ایجوکیشن اتھارٹیز کو ارسال کر دیا ہے تاکہ تمام اضلاع میں احکامات پر عملدرآمد یقینی بنایا جا سکے۔ رانا سکندر حیات نے اپنی پوسٹ میں یہ بھی کہا کہ بچوں کی صحت حکومت کی پہلی ترجیح ہے، اس لیے موسم کی شدت کے پیش نظر اسکولوں کی بروقت بندش انتہائی ضروری تھی۔

انہوں نے والدین سے اپیل کی کہ وہ تعطیلات کے دوران بچوں کو سرد موسم سے بچانے کے لیے احتیاطی تدابیر اختیار کریں اور ان چھٹیوں کو بچوں کے لیے مفید اور مثبت سرگرمیوں سے بھرپور بنائیں۔