گھی اور کوکنگ آئل کی قیمتوں میں اضافہ

ملک میں اس ہفتے مجموعی مہنگائی میں معمولی کمی ریکارڈ کی گئی ہے۔ وفاقی ادارہ شماریات کے مطابق ہفتہ وار مہنگائی کی شرح میں 0.03 فیصد کمی ہوئی، جس کے بعد سالانہ افراطِ زر کم ہو کر 3.90 فیصد رہ گئی ہے۔ رپورٹ کے مطابق روزمرہ استعمال کی 12 اشیاء کی قیمتوں میں اضافہ ہوا، 10 اشیاء سستی ہوئیں جبکہ 29 اشیاء کی قیمتیں مستحکم رہیں۔

اعداد و شمار کے مطابق مہنگی ہونے والی اشیاء میں مرغی، آٹا، انڈے، گھی اور کوکنگ آئل شامل ہیں۔ مرغی کی قیمت میں 6.19 فیصد اضافہ ریکارڈ کیا گیا، جو اس ہفتے قیمتوں میں نمایاں اضافوں میں شمار ہوا۔ آٹے کی قیمت میں بھی 2.88 فیصد اضافہ دیکھا گیا، جس کے بعد اس کی اوسط قیمت میں مزید بوجھ پڑا۔ اسی طرح انڈوں کی قیمتیں بھی 0.93 فیصد بڑھ گئیں، جبکہ دال مونگ کی قیمت میں بھی اضافہ رپورٹ ہوا۔

اس کے برعکس چند اہم سبزیاں اور خوردنی اشیاء سستی ہوئیں، جس سے شہریوں کو معمولی ریلیف ملا۔ ٹماٹر کی قیمت میں 16.18 فیصد کمی ریکارڈ کی گئی، جو اس ہفتے سب سے نمایاں کمی ہے۔ چینی بھی 4.91 فیصد سستی ہوئی، جبکہ پیاز کی قیمت میں 4.08 فیصد اور آلو کی قیمت میں 1.71 فیصد کمی آئی۔

یہ بھی پڑھیں: مہنگائی میں کمی یا اضافہ؟، ادارہ شماریات کے نئے اعدادوشماری جاری

رپورٹ میں مزید بتایا گیا کہ کیلے، دال چنا، دال مسور اور ایل پی جی بھی اس ہفتے سستی ہونے والی اشیاء میں شامل رہیں، جس سے مجموعی مہنگائی کی رفتار میں کمی کے رحجان کی تصدیق ہوتی ہے۔

وفاقی ادارہ شماریات کے مطابق قیمتوں میں یہ اتار چڑھاؤ مسلسل مانیٹری پالیسی اقدامات، زرعی رسد، اور مارکیٹ میں دستیابی کی صورتحال سے جڑا ہوا ہے، تاہم مجموعی طور پر حالیہ ہفتے میں مہنگائی کی رفتار میں معمولی کمی ایک مثبت اشارہ ہے۔