’ایزی پیسہ‘ بینک اکاؤنٹ استعمال کرنے والوں کے لیے بڑی خوشخبری

ایزی پیسہ ڈیجیٹل بینک نے اپنی ڈیجیٹل بینکنگ آپریشنز کی پہلی سالگرہ کے موقع پر اہم پیش رفت کا اعلان کرتے ہوئے کہا ہے کہ اب ایزی پیسہ صارفین 100 سے زیادہ کرنسیوں میں سرحد پار ادائیگیاں کر سکیں گے اور دنیا کے 100 سے زیادہ ممالک سے ترسیلاتِ زر براہِ راست اپنے ایزی پیسہ اکاؤنٹس میں وصول کر سکیں گے۔

یہ بھی پڑھیں:پاکستان کا پہلا ڈیجیٹل بینک ایزی پیسہ بن گیا، وزیر خزانہ

 اس موقع پر مقامی ہوٹل میں سٹیک ہولڈرز کے اعزاز میں عشائیے کا اہتمام کیا گیا جس میں وفاقی وزرا، پالیسی سازوں، ریگولیٹرز، کاروباری رہنماؤں اور میڈیا نمائندگان نے شرکت کی۔

تقریب کی میزبانی بورڈ چیئرمین ایزی پیسہ ڈیجیٹل بینک عرفان وہاب خان، اینٹ انٹرنیشنل کے صدر ڈگلس فیگن اور ایزی پیسہ ڈیجیٹل بینک کے صدر و چیف ایگزیکٹو آفیسر جہانزیب خان نے کی۔ تقریب سے خطاب کرتے ہوئے مہمانِ خصوصی وفاقی وزیر برائے انفارمیشن ٹیکنالوجی و ٹیلی کمیونیکیشن شزہ فاطمہ خواجہ نے ایزی پیسہ کو ڈیجیٹل بینک کے طور پر ایک سال مکمل کرنے پر مبارکباد دی۔

انہوں نے کہا کہ وزیراعظم کی ہدایات کے مطابق ڈیجیٹل معیشت کا فروغ حکومت کی اولین ترجیح ہے اور اس مقصد کے لیے مربوط اور ٹھوس اقدامات کئے جا رہے ہیں، ڈیجیٹل بینکنگ مالی شمولیت اور معیشت کی دستاویزی شکل کے لیے کلیدی کردار ادا کر رہی ہے۔

وزیرِ مملکت برائے خزانہ بلال اظہر کیانی نے تقریب سے خطاب کرتے ہوئے کہا کہ مؤثر پالیسی سازی کے لیے ڈیجیٹل فنانس کے ماہرین کی شمولیت ناگزیر ہے۔ ان کا کہنا تھا کہ کیش لیس معیشت کے حقیقی اور عملی فوائد کو عوام کے سامنے لانا وقت کی اہم ضرورت ہے تاکہ شفافیت بڑھے اور معیشت مستحکم ہو۔

ایزی پیسہ ڈیجیٹل بینک کی جانب سے جاری کردہ اعداد و شمار کے مطابق سال 2025 کے دوران ایزی پیسہ پلیٹ فارم کے ذریعے 3.8 ارب سے زیادہ ڈیجیٹل ٹرانزیکشنز ہوئیں جن کی مجموعی مالیت 15 کھرب روپے سے تجاوز کر گئی۔ بینک کے مطابق اس وقت ڈیجیٹل لین دین پاکستان کی مجموعی قومی پیداوار جی ڈی پی کے اندازاً 11 فیصد کے برابر ہو چکے ہیں جبکہ ہر پانچ میں سے ایک پاکستانی ایزی پیسہ صارف ہے۔

مزید پڑھیں:اسٹیٹ بینک نے ڈیجیٹل ریٹیل بینک کا پہلا لائسنس ایزی پیسہ بینک کو دے دیا

اعداد و شمار کے مطابق ایزی پیسہ صارفین میں خواتین کی نمائندگی 31 فیصد ہے جو ملک میں ڈیجیٹل شمولیت کے فروغ اور خواتین کی مالی خودمختاری کے حوالے سے ایزی پیسہ کے بڑھتے ہوئے کردار کو ظاہر کرتی ہے۔ انتظامیہ کا کہنا تھا کہ خواتین اور کم آمدنی والے طبقات کو ڈیجیٹل مالی نظام میں شامل کرنا ایزی پیسہ کی ترجیحات میں سرفہرست ہے۔

تقریب کے دوران اینٹ انٹرنیشنل کے ورلڈ فرسٹ پلیٹ فارم کے ساتھ ایزی پیسہ کی شراکت داری کے آغاز کا باضابطہ اعلان بھی کیا گیا۔ اعلان کے مطابق اس شراکت داری کے تحت ایزی پیسہ صارفین اب 100 سے زیادہ کرنسیوں میں بین الاقوامی ادائیگیاں کر سکیں گے اور 100 سے زیادہ ممالک سے ترسیلاتِ زر براہِ راست اپنے ایزی پیسہ اکاؤنٹس میں وصول کر سکیں گے۔ اس اقدام سے خلیجی ممالک، برطانیہ اور امریکا جیسے روایتی ترسیلاتی کوریڈورز سے آگے عالمی سطح پر رسائی ممکن ہو گی۔

ایزی پیسہ انتظامیہ کے مطابق اس نئی سہولت سے فری لانسرز، برآمد کنندگان اور بیرونِ ملک مقیم پاکستانیوں کو تیز، محفوظ اور آسان مالی سہولیات میسر آئیں گی، جس سے نہ صرف ترسیلاتِ زر میں اضافہ ہوگا بلکہ ڈیجیٹل معیشت کے فروغ اور مالی نظام میں شفافیت کو بھی تقویت ملے گی۔