محکمہ موسمیات نے ملک کے مختلف علاقوں میں بارش اور برفباری کی پیشگوئی کردی

محکمہ موسمیات نے آئندہ دنوں کے دوران ملک کے مختلف حصوں کے لیے موسم سے متعلق تفصیلی پیش گوئی جاری کرتے ہوئے بتایا ہے کہ اسلام آباد اور اس سے ملحقہ علاقوں میں تیز ہواؤں کے ساتھ بارش متوقع ہے، جبکہ ملک کے پہاڑی علاقوں میں برف باری کا امکان ظاہر کیا گیا ہے۔ محکمہ موسمیات کے مطابق مجموعی طور پر ملک کے بیشتر حصوں میں موسم سرد رہے گا اور کئی علاقوں میں جزوی ابر آلود کیفیت برقرار رہنے کی توقع ہے۔

محکمہ موسمیات کی جانب سے جاری بیان میں کہا گیا ہے کہ شمالی و مغربی بلوچستان، خیبرپختونخوا، گلگت بلتستان، کشمیر اور پوٹھوہار کے مختلف علاقوں میں بارش کا امکان ہے، جبکہ ان خطوں کے پہاڑی علاقوں میں برف باری بھی متوقع ہے۔ اسی پیش گوئی کے مطابق اسلام آباد اور اس کے گرد و نواح میں تیز ہوائیں چلنے کے ساتھ بارش ہو سکتی ہے، جس کے باعث سردی کی شدت میں اضافہ ہونے کا امکان ہے۔

محکمہ موسمیات نے مزید آگاہ کیا ہے کہ مشرقی پنجاب اور بالائی سندھ کے بعض علاقوں میں دھند یا اسموگ برقرار رہنے کا خدشہ ہے، جس سے روزمرہ زندگی اور آمدورفت متاثر ہو سکتی ہے۔ اس کے ساتھ ساتھ سیاحتی مقامات مری، گلیات، ناران، کاغان اور دیگر بالائی علاقوں میں برف باری کی پیش گوئی بھی کی گئی ہے۔ محکمہ موسمیات کے مطابق ان علاقوں میں برف باری کے باعث سڑکوں پر پھسلن پیدا ہونے کا خطرہ موجود ہے۔

یہ بھی پڑھیں: رجب المرجب کا چاند کب نظر آئیگا؟ سپارکو نے پیشگوئی کردی

اسی طرح پنجاب کے شمالی اضلاع میں بارش کا امکان ظاہر کیا گیا ہے اور بعض مقامات پر گرج چمک کے ساتھ بارش ہو سکتی ہے۔ تاہم سندھ کے بیشتر اضلاع میں موسم سرد اور خشک رہنے کی توقع ہے، جبکہ صوبے کے بالائی اضلاع میں جزوی ابر آلود موسم رہنے کا امکان ظاہر کیا گیا ہے۔

بلوچستان کے کئی اضلاع میں بھی بارش کی پیش گوئی کی گئی ہے اور صوبے کے پہاڑی علاقوں میں برف باری کا امکان ہے۔ محکمہ موسمیات کے مطابق گلگت بلتستان اور کشمیر میں بارش اور برف باری کے نتیجے میں سفری مشکلات پیش آ سکتی ہیں، جس کے باعث وہاں سفر کرنے والوں کو احتیاط برتنے کی ضرورت ہے۔