ڈیٹا محفوظ کر لیں، مائیکروسافٹ نے صارفین کو خبردار کر دیا

مائیکروسافٹ نے دنیا بھر میں اسکائپ استعمال کرنے والے لاکھوں صارفین کو خبردار کیا ہے کہ وہ اپنا اہم ڈیٹا بروقت محفوظ کر لیں، بصورتِ دیگر یہ معلومات ہمیشہ کے لیے ضائع ہو سکتی ہیں۔

کمپنی کے مطابق اگر مقررہ مدت تک ڈیٹا محفوظ یا منتقل نہ کیا گیا تو اسے مستقل طور پر حذف کر دیا جائے گا، جس کی بعد میں بحالی ممکن نہیں ہوگی۔

مائیکروسافٹ نے بتایا ہے کہ اسکائپ کو رواں سال مکمل طور پر بند کر دیا گیا ہے تاکہ کمپنی اپنی توجہ اور وسائل مائیکروسافٹ ٹیمز پر مرکوز کر سکے۔

اسکائپ ایک وقت میں دنیا کی مقبول ترین چیٹ اور ویڈیو کالنگ ایپلی کیشنز میں شمار ہوتی تھی، جو 2010 کی دہائی میں 30 کروڑ سے زائد ماہانہ صارفین کے ساتھ اپنے عروج پر تھی تاہم وقت کے ساتھ واٹس ایپ، زوم اور مائیکروسافٹ ٹیمز جیسے جدید اور موبائل فرینڈلی پلیٹ فارمز کے آنے سے اس کی مقبولیت میں نمایاں کمی آتی چلی گئی۔

اسکائپ کا آغاز 2003 میں ہوا تھا، جبکہ 2011 میں مائیکروسافٹ نے اسے خرید لیا،  کمپنی نے باضابطہ طور پر 5 مئی 2023 کو اس سروس کو ختم کرنے کا اعلان کیا، تاہم صارفین کو اپنے پیغامات، کال ہسٹری، رابطہ نمبرز اور دیگر اہم ڈیٹا محفوظ کرنے کے لیے اضافی مہلت فراہم کی گئی تھی۔

یہ بھی پڑھیں: واٹس ایپ صارفین!، خبردار ’’ایسی کال‘‘ ہرگز نہ اٹھائیں، این سی سی آئی اے کا الرٹ جاری

مائیکروسافٹ کے مطابق اسکائپ صارفین کے پاس جنوری 2026 تک کا وقت ہے کہ وہ اپنا ڈیٹا ایکسپورٹ کر لیں یا اپنی مرضی سے حذف کر دیں،  کمپنی نے یہ بھی واضح کیا ہے کہ جو صارفین اس مدت کے دوران مائیکروسافٹ ٹیمز فری میں لاگ ان ہو جائیں گے، انہیں اپنی اسکائپ چیٹ اور کال ہسٹری تک رسائی حاصل رہے گی۔

کمپنی نے متنبہ کیا ہے کہ اگر جنوری 2026 تک کوئی اقدام نہ کیا گیا تو تمام اسکائپ ڈیٹا خودکار طور پر مستقل طور پر حذف کر دیا جائے گا۔ نئے سال کی آمد کے پیش نظر مائیکروسافٹ نے صارفین سے اپیل کی ہے کہ وہ فوری طور پر اپنے اکاؤنٹس چیک کریں اور اہم معلومات اور یادگار لمحات کو ضائع ہونے سے بچائیں۔