وزیر اعظم شہباز شریف دوروزہ دورے پر آسٹریا پہنچ گئے،پرتپاک استقبال

وزیرِ اعظم شہباز شریف آسٹریا کے چانسلر کرسچیئن اسٹاکر کی دعوت پر دو روزہ سرکاری دورے پر آسٹریا کے دارالحکومت ویانا پہنچ گئے، ویانا کے بین الاقوامی ہوائی اڈے پر آسٹرین حکام نے وزیرِ اعظم اور پاکستانی وفد کا پرتپاک استقبال کیا جبکہ آسٹرین مسلح افواج کے چاق و چوبند دستے نے انہیں سلامی پیش کی۔

وزیرِ اعظم کے ہمراہ نائب وزیرِ اعظم و وزیرِ خارجہ اسحاق ڈار، وفاقی وزیرِ اطلاعات عطاء اللہ تارڑ اور دیگر اعلیٰ حکام بھی موجود ہیں۔ یہ دورہ پاکستان اور آسٹریا کے درمیان دوطرفہ تعلقات کو مزید مضبوط بنانے کے لیے اہم پیش رفت قرار دیا جا رہا ہے۔

یہ بھی پڑھیں :وزیرِاعظم شہباز شریف کا 3 دہائیوں بعد ویانا کا اہم دورہ، آسٹریا کے ساتھ تعلقات میں نیا موڑ

دورے کے دوران وزیرِ اعظم شہباز شریف آسٹرین چانسلر کے ساتھ اہم ملاقات کریں گے، جس میں دونوں ممالک کے درمیان تجارت، سرمایہ کاری اور اقتصادی تعاون کو فروغ دینے پر تبادلۂ خیال کیا جائے گا۔ اس کے علاوہ دونوں رہنما کاروباری شخصیات کے مشترکہ اجلاس کی صدارت بھی کریں گے، جس کا مقصد سرمایہ کاری کے نئے مواقع پیدا کرنا اور تجارتی روابط کو وسعت دینا ہے۔

وزیرِ اعظم محمد شہباز شریف کا دورہءِ آسٹریا

آسٹریا کے چانسلر کرسچیئن اسٹاکر کی دعوت پر وزیرِ اعظم محمد شہباز شریف اپنے دو روزہ دورہء آسٹریا پر ویانا پہنچ گئے.

ویانا انٹرنیشنل ایئرپورٹ پہنچنے پر وزیرِ اعظم اور پاکستانی وفد کا پر تپاک استقبال، آسٹرین مسلح افواج کے دستے نے سلامی… pic.twitter.com/sCSDcFqeY6

— PTV News (@PTVNewsOfficial) February 15, 2026

وزیرِ اعظم پاکستان آسٹریا بزنس فورم میں بھی شرکت کریں گے اور خطاب کے ذریعے پاکستان میں سرمایہ کاری کے امکانات کو اجاگر کریں گے۔ اس موقع پر وہ عالمی سطح پر ترقی، امن اور خوشحالی سے متعلق اقوام متحدہ کے تحت منعقدہ ایک خصوصی تقریب میں بھی شرکت اور خطاب کریں گے۔

 وزیرِ اعظم کی انٹرنیشنل اٹامک انرجی ایجنسی کے ڈائریکٹر جنرل سے ملاقات بھی متوقع ہے، جس میں جوہری توانائی کے پرامن استعمال اور تکنیکی تعاون کے حوالے سے گفتگو ہوگی۔ یہ دورہ دونوں ممالک کے درمیان اقتصادی، سفارتی اور تکنیکی تعاون کو نئی جہت دینے میں اہم کردار ادا کر سکتا ہے۔