ویمنز ایشیا کپ رائزنگ اسٹارز، پاکستان کی شاندار فتح، یو اے ای کو ہرا کر سیمی فائنل میں جگہ بنا لی

ویمنز ایشیا کپ رائزنگ اسٹارز میں پاکستان ویمنز ٹیم نے شاندار کارکردگی کا مظاہرہ کرتے ہوئے متحدہ عرب امارات خواتین کرکٹ ٹیم کو بآسانی شکست دے کر سیمی فائنل کے لیے کوالیفائی کر لیا۔

بینکاک میں کھیلے گئے اہم میچ میں پاکستان خواتین کرکٹ ٹیم نے ٹاس جیت کر پہلے فیلڈنگ کا فیصلہ کیا جو درست ثابت ہوا۔ پاکستانی بولرز نے ابتدا ہی سے نپی تلی لائن اور لینتھ کے ساتھ حریف بیٹرز کو دباؤ میں رکھا۔

یہ بھی پڑھیں:پاکستان کا اہم میچ، 2 امکانات’جیت بھی فائدہ، بارش بھی فائدہ، مگر کیسے؟

یو اے ای کی پوری ٹیم 17.2 اوورز میں صرف 79 رنز پر آؤٹ ہو گئی۔ تھیرتا ستیش نے 32 رنز بنا کر کچھ مزاحمت کی جبکہ رینیتھا رجت 14 رنز اسکور کر سکیں، تاہم دیگر بیٹرز پاکستانی بولنگ کے سامنے زیادہ دیر نہ ٹھہر سکیں۔

پاکستان کی جانب سے انوشہ ناصر نے شاندار بولنگ کرتے ہوئے 3 کھلاڑیوں کو پویلین کی راہ دکھائی۔ حفصہ خالد نے 2 وکٹیں حاصل کیں جبکہ وحیدہ اختر، عمیمہ سہیل، مومنہ ریاست اور گل رخ نے ایک ایک وکٹ لے کر ٹیم کی کامیابی میں اہم کردار ادا کیا۔

80 رنز کا ہدف پاکستان نے صرف 11 اوورز میں ایک وکٹ کے نقصان پر حاصل کر لیا، جو ٹیم کی مضبوط بیٹنگ لائن کا ثبوت ہے۔ شوال ذوالفقار نے 38 رنز کی پراعتماد اننگز کھیلی جبکہ حورینہ سجاد 26 رنز بنا کر ناقابل شکست رہیں۔ دونوں کے درمیان عمدہ شراکت نے میچ یکطرفہ بنا دیا۔ ایمان نصیر 12 رنز بنا کر آؤٹ ہوئیں۔

ایونٹ کے دونوں سیمی فائنل 20 فروری کو کھیلے جائیں گے۔ پہلے سیمی فائنل میں بھارت خواتین کرکٹ ٹیم کا مقابلہ سری لنکا خواتین کرکٹ ٹیم اور تھائی لینڈ خواتین کرکٹ ٹیم کے درمیان جاری میچ کی فاتح ٹیم سے ہوگا۔

پاکستان ٹیم دوسرے سیمی فائنل میں بنگلادیش خواتین کرکٹ ٹیم کے مدمقابل آئے گی۔ شائقین کو امید ہے کہ پاکستان اپنی موجودہ فارم برقرار رکھتے ہوئے فائنل تک رسائی حاصل کرے گا اور ٹائٹل جیتنے کی مضبوط دعویدار ثابت ہوگا۔