سابق مایہ ناز ال راؤنڈر عبدالرزاق کی دوسری شادی کی خواہش، اہلیہ کا چونکا دینے والا ردعمل

پاکستان کرکٹ ٹیم کے سابق آل راؤنڈر عبدالرزاق نے ایک نجی ٹی وی پروگرام میں گفتگو کرتے ہوئے اپنی دوسری شادی کی خواہش کا اظہار کر کے نئی بحث چھیڑ دی، جبکہ ان کی اہلیہ  عائشہ رزاق نے بھی اس حوالے سے کھل کر اپنا موقف بیان کیا۔

پروگرام کے دوران عبدالرزاق نے مسکراتے ہوئے کہا کہ وہ دوسری شادی کی خواہش رکھتے ہیں اور اس بارے میں اپنی اہلیہ سے کئی بار بات بھی کر چکے ہیں۔ ان کا کہنا تھا کہ ان کی اہلیہ ہر معاملے میں ان کا بھرپور ساتھ دیتی ہیں اور گھریلو و پیشہ ورانہ معاملات میں ہمیشہ مددگار ثابت ہوئی ہیں۔

یہ بھی پڑھیں:عبدالرزاق کی اسٹرائیک فورس کام دکھانے لگی، حسن نواز پہلا شاہکار

انہوں نے گفتگو کو آگے بڑھاتے ہوئے کہا کہ جب بھی وہ گھر میں دوسری شادی کا ذکر کرتے ہیں تو اکثر جواب ان کی بیٹی کی طرف سے آ جاتا ہے۔ اس موقع پر ان کی اہلیہ عائشہ رزاق نے بھی دلچسپ انداز میں کہا کہ بیٹی کو صرف اپنے والد کو دیکھنا ہی کافی ہوتا ہے، جبکہ بیٹا قدرے معصوم ہے اور وہ اس معاملے کو برداشت نہیں کرے گا۔

سابق آل راؤنڈر نے کہا کہ ہر فرد کو اپنی زندگی کے فیصلے کرنے کا حق حاصل ہے اور موجودہ دور میں بعض لوگ دوسری یا تیسری شادی کو ایک سماجی رجحان کے طور پر بھی دیکھتے ہیں۔ ان کے اس بیان نے پروگرام کے بعد سوشل میڈیا پر نئی بحث کو جنم دے دیا۔

یاد رہے کہ عبدالرزاق پاکستان کرکٹ ٹیم کے مایہ ناز آل راؤنڈر رہ چکے ہیں اور کئی تاریخی فتوحات میں نمایاں کردار ادا کر چکے ہیں۔ ان کی ذاتی زندگی سے متعلق بیان سامنے آنے کے بعد مداحوں اور ناقدین دونوں کی جانب سے مختلف آرا سامنے آ رہی ہیں۔ کچھ صارفین کا کہنا ہے کہ یہ ان کا ذاتی معاملہ ہے اور انہیں اپنی زندگی کے فیصلوں کا اختیار ہے، جبکہ بعض افراد نے اس بیان پر تنقید کرتے ہوئے اسے غیر ضروری عوامی موضوع قرار دیا۔

سماجی حلقوں میں بھی اس بیان پر گفتگو جاری ہے، جہاں خاندانی نظام، ازدواجی ذمہ داریوں اور معاشرتی اقدار کے تناظر میں مختلف نقطہ نظر سامنے آ رہے ہیں۔ بعض مبصرین کا کہنا ہے کہ عوامی شخصیات کے بیانات معاشرے پر اثر انداز ہوتے ہیں، اس لیے انہیں حساس موضوعات پر گفتگو میں احتیاط برتنی چاہیے۔