پاکستان کا ہر شہری ایران کے غم میں سوگوار ہے، احتجاج کریں مگر قانون ہاتھ میں نہ لیں، وزیر داخلہ محسن نقوی کی اپیل

وفاقی وزیر داخلہ محسن نقوی نے آیت اللہ سید علی خامنہ ای کی شہادت کے بعد ملک کی موجودہ صورتحال پر اہم گفتگو کرتے ہوئے کہا ہے کہ آج امت مسلمہ، ایران اور پاکستان کے عوام کے لیے سوگوار دن ہے۔

یہ بھی پڑھیں:ایرانی فوج کو بڑا دھچکا، چیف آف اسٹاف عبدالرحیم موسوی بھی امریکا،اسرائیل حملوں میں شہید

صحافیوں سے گفتگو کرتے ہوئے انہوں نے کہا کہ آیت اللہ خامنہ ای کی شہادت کے بعد پاکستان کا ہر شہری اسی طرح غمزدہ ہے جس طرح ایران کے شہری اس وقت شدید دکھ اور صدمے کی کیفیت سے گزر رہے ہیں۔ ان کا کہنا تھا کہ یہ لمحہ صرف ایران کا نہیں بلکہ پوری امت مسلمہ کا مشترکہ غم ہے۔

پرامن احتجاج کی اپیل

وزیر داخلہ نے شہریوں سے درخواست کی کہ وہ اپنے جذبات کا اظہار ضرور کریں، مگر قانون کو ہرگز ہاتھ میں نہ لیں۔ انہوں نے کہا کہ احتجاج ہر شہری کا حق ہے لیکن اسے پرامن انداز میں ریکارڈ کرایا جائے تاکہ ملک میں امن و امان کی صورتحال برقرار رہے۔

محسن نقوی نے کہا کہ حکومت شہریوں کے جذبات سے پوری طرح آگاہ ہے اور ان کے دکھ میں برابر کی شریک ہے۔ انہوں نے یقین دلایا کہ ریاست عوام کے جان و مال کے تحفظ کو یقینی بنانے کے لیے تمام ضروری اقدامات کر رہی ہے۔

قومی یکجہتی کی ضرورت

انہوں نے مزید کہا کہ موجودہ حالات میں اتحاد، صبر اور دانشمندی کی اشد ضرورت ہے۔ کسی بھی قسم کی اشتعال انگیزی یا انتشار دشمن کے عزائم کو تقویت دے سکتا ہے۔ انہوں نے زور دیا کہ ہم سب ایک قوم ہیں اور مشکل وقت میں یکجہتی ہی ہماری سب سے بڑی طاقت ہے۔

وزیر داخلہ نے دعا کی کہ اللہ تعالیٰ امت مسلمہ کو صبر جمیل عطا فرمائے اور پاکستان کو ہر قسم کی اندرونی و بیرونی سازشوں سے محفوظ رکھے۔