پاکستان سے عرب ممالک جانیوالے مسافروں کیلئے آج کی پروازوں کی صورتحال

مشرقِ وسطیٰ میں جاری کشیدہ صورتحال کے باعث پاکستان سے متحدہ عرب امارات، بحرین، کویت، قطر اور دیگر خلیجی ممالک جانے والی پروازوں کی منسوخی کا سلسلہ بدستور جاری ہے اور آج بھی مجموعی طور پر 116 پروازیں منسوخ کر دی گئیں، جس کے باعث ہزاروں مسافر متاثر ہوئے۔

ایوی ایشن ذرائع کے مطابق سب سے زیادہ منسوخیاں جناح انٹرنیشنل ایئرپورٹ سے ہوئیں جہاں دبئی، ابو ظبی، دوحہ، شارجہ، کویت اور بحرین جانے والی 32 پروازیں آپریٹ نہ ہو سکیں۔ اسی طرح اسلام آباد انٹرنیشنل ایئرپورٹ سے دبئی، ابو ظبی، دوحہ، بحرین، کویت اور شارجہ سمیت مختلف مقامات کی 28 پروازیں منسوخ کی گئیں۔

علامہ اقبال انٹرنیشنل ایئرپورٹ لاہور پر دبئی، ابو ظبی، قطر، کویت اور بحرین کی 20 پروازیں منسوخ ہوئیں، جبکہ باچا خان انٹرنیشنل ایئرپورٹ پشاور سے دبئی، شارجہ، قطر اور ابو ظبی کی 16 پروازیں آپریٹ نہ ہو سکیں۔ اسی طرح ملتان انٹرنیشنل ایئرپورٹ سے دبئی، شارجہ، راس الخیمہ، بحرین، دوحہ اور کویت کی 10 پروازیں منسوخ کی گئیں۔

یہ بھی پڑھیں:بینظیر کفالت پروگرام کی امدادی رقم بڑھا دی گئی،کتنا اضافہ ہوا ،تفصیلات جانیے

مزید برآں فیصل آباد انٹرنیشنل ایئرپورٹ سے مشرقِ وسطیٰ کی 4 جبکہ کوئٹہ انٹرنیشنل ایئرپورٹ سے 2 پروازیں منسوخ کی گئیں۔ ایوی ایشن حکام کا کہنا ہے کہ خطے میں فضائی حدود کی بندش، سکیورٹی خدشات اور آپریشنل وجوہات کے باعث فلائٹ شیڈول متاثر ہو رہا ہے۔

پروازوں کی منسوخی کے باعث ایئرپورٹس پر مسافروں کا رش بڑھ گیا ہے، جہاں متعدد افراد کو اپنی پروازوں کے ازسرنو شیڈول یا رقم کی واپسی کے لیے ایئرلائنز کاؤنٹرز سے رجوع کرنا پڑ رہا ہے۔ حکام نے مسافروں کو ہدایت کی ہے کہ وہ ایئرپورٹ روانگی سے قبل متعلقہ ایئرلائن سے اپنی پرواز کی صورتحال ضرور معلوم کریں تاکہ غیر ضروری پریشانی سے بچا جا سکے۔

ایوی ایشن ماہرین کے مطابق اگر خطے میں کشیدگی برقرار رہی تو آئندہ دنوں میں بھی پروازوں کے شیڈول متاثر ہونے کا خدشہ موجود ہے، تاہم حکام صورتحال پر مسلسل نظر رکھے ہوئے ہیں اور جیسے ہی حالات معمول پر آئیں گے، پروازوں کی بحالی کا اعلان کر دیا جائے گا۔