پاکستان میں عید جمعہ یا ہفتہ کو ہو گی ،نظریں رویت ہلال کمیٹی پر لگ گئیں

عیدالفطر جمعہ کو ہوگی یا ہفتہ 21 مارچ کو، اس کا حتمی فیصلہ کل مرکزی رویت ہلال کمیٹی کے اجلاس میں کیا جائے گا۔

مرکزی رویت ہلال کمیٹی کا اجلاس چیئرمین عبدالخبیر آزاد کی سربراہی میں اسلام آباد میں وزارت مذہبی امور کے دفتر میں منعقد ہوگا، جہاں ملک بھر سے موصول ہونے والی شہادتوں کی بنیاد پر چاند نظر آنے یا نہ آنے کا اعلان کیا جائے گا۔

ذرائع کے مطابق زونل رویت ہلال کمیٹیوں کے اجلاس بھی اپنے اپنے ہیڈکوارٹرز میں بیک وقت منعقد ہوں گے، جہاں مقامی سطح پر چاند دیکھنے کی شہادتیں جمع کی جائیں گی اور مرکزی کمیٹی کو ارسال کی جائیں گی۔

یہ بھی پڑھیں:وزیر اعظم نے سرکاری ملازمین کو بڑی خوشخبری سنادی

اجلاس میں سپارکو اور محکمہ موسمیات کے نمائندے بھی شریک ہوں گے، جو سائنسی بنیادوں پر چاند کی پیدائش اور رویت کے امکانات سے متعلق بریفنگ دیں گے۔

مرکزی رویت ہلال کمیٹی تمام شہادتوں اور سائنسی معلومات کا جائزہ لینے کے بعد عیدالفطر کی تاریخ کا باضابطہ اعلان کرے گی، جس کا ملک بھر میں بے چینی سے انتظار کیا جا رہا ہے۔