By وفاقی وزیر اطلاعات عطاء اللہ تارڑ کا کہنا ہے کہ کوئی کسی بھول میں نہ رہے۔ سرکاری املاک، اداروں اور محکموں کا دفاع کرنا خوب جانتے ہیں۔
تفصیلات کے مطابق عطا اللہ تارڑ نے وزیر اعلیٰ خیبر پختونخوا علی امین گنڈاپور کے بیان پر ردعمل دیتے ہوئے کہا کہ گنڈا پور کبھی اسلام آباد پر چڑھائی ، کبھی پشاور الیکٹرک پر قبضے اور کبھی وفاقی کابینہ کو 15 دن کی ڈیڈ لائن کی دھمکیاں دے ر ہے ہیں یہ ان کی بھول ہے۔ حکومت سر کاری املاک، اداروں اور محکموں کا دفاع کرنا خوب جانتی ہے ۔ ان کا کہنا تھا کہ خیبر پختونخوا حکومت بجلی، گندم اور محاصل کے حوالے سے لگا تار جھوٹ بول کر سیاسی آگ بھڑکانے کی کوشش ناکام کر رہی ہے، اس کی یہ کوشش کبھی کامیاب نہیں ہونے دیں گے ۔ عطاء اللہ تارڑ کا کہنا تھا کہ کسی کو قانون ہاتھ میں نہیں لینے دیں گے ، خلاف ورزی کرنے والوں کے خلاف سخت کارروائی عمل میں لائی جائے گی ۔ انہوں نے کہا کہ وفاقی حکومت سیاسی اختلافات سے بالاتر ہوکر آئین اور قانون کے مطابق خیبر پختونخوا کے عوام کے حقوق اور وسائل کی فراہمی میں ا پنی کوئی کسر نہیں چھوڑے گی ۔
واضح رہے کہ صوبائی اسمبلی میں خطاب کے دوران علی امین گنڈا پور نے وفاقی حکومت پر تنقید کے نشتر چلاتے ہوئے کہا تھا کہ آپ کا زور آزادکشمیر میں دیکھ لیا،کشمیریوں کے سامنے ایک دن میں وفاقی حکومت کی ہوا نکل گئی، خدانخواستہ خیبر پختونخوا کے عوام سڑکوں پر نکل آئے تو حالات کنٹرول کرنا آپ کے بس کی بات نہیں ۔ وزیر اعلیٰ خیبر پختونخوا علی امین گنڈا پور نے یہ بھی کہا تھا کہ ملک کی بجلی آن اور آف کرنے کا بٹن خیبر پختونخوا کے پاس ہے، آ ئیں ساتھ بیٹھیں اور ہمارے مسائل حل کریں ورنہ غیر ذمہ دار لفظ چھوٹا ہوگا۔ علی امین گنڈا پور نےمزید کہا تھاکہ ہماری بات نہ سنی گئی تو خیبرپختونخوا میں واپڈا کے دفاتر قبضہ کر کے دکھائیں گے، ان کا کہنا تھا کہ اپنے صوبے کے عوام کے لیے چور کا لفظ برداشت نہیں کریں گے، چور کون ہے دنیا جانتی اور پہچانتی ہے۔
