اسلام آباد: امریکا اور ایران کے درمیان مجوزہ امن معاہدے کی خبروں نے عالمی سطح پر توجہ حاصل کر لی ہے، جبکہ اس معاملے پر وزیراعظم شہباز شریف کا سوشل میڈیا پیغام بھی غیر معمولی مقبولیت حاصل کرنے میں کامیاب رہا۔
وزیراعظم کی جانب سے امن کوششوں کے حق میں جاری کیے گئے بیان کو چند ہی گھنٹوں میں 40 لاکھ سے زائد افراد نے دیکھا جس کے بعد یہ پیغام مختلف ممالک میں ٹاپ ٹرینڈز میں شامل ہو گیا۔
وزیراعظم شہباز شریف نے اپنے پیغام میں خطے اور دنیا میں امن، استحکام اور سفارتی حل کی ضرورت پر زور دیتے ہوئے کہا کہ تنازعات کے خاتمے اور مذاکرات کے فروغ سے ہی عالمی امن کو یقینی بنایا جا سکتا ہے۔ انہوں نے امریکا، ایران اور دیگر متعلقہ فریقوں کی جانب سے کشیدگی کم کرنے کی کوششوں کا خیرمقدم کرتے ہوئے امید ظاہر کی کہ جاری سفارتی عمل مثبت نتائج دے گا۔
وزیراعظم کے بیان کے بعد سوشل میڈیا پر صارفین کی بڑی تعداد نے اپنے ردعمل کا اظہار کیا۔ کئی صارفین نے امن اور مذاکرات کے فروغ کے حوالے سے وزیراعظم کے مؤقف کو سراہا جبکہ مختلف سیاسی اور سفارتی حلقوں میں بھی اس بیان پر تبصرے دیکھنے میں آئے۔ چند گھنٹوں کے دوران لاکھوں ویوز اور ہزاروں تبصروں کے باعث یہ پیغام عالمی سطح پر زیر بحث موضوعات میں شامل ہو گیا۔
دوسری جانب امریکا اور ایران کے درمیان ممکنہ امن معاہدے کے حوالے سے بھی سرگرمیاں تیز ہو گئی ہیں۔ سفارتی ذرائع کے مطابق فریقین کے درمیان کئی اہم امور پر پیش رفت ہوئی ہے اور مجوزہ معاہدے کو خطے میں کشیدگی کم کرنے کی جانب ایک اہم قدم قرار دیا جا رہا ہے۔ عالمی برادری اس پیش رفت پر گہری نظر رکھے ہوئے ہے کیونکہ اس کے اثرات نہ صرف مشرقِ وسطیٰ بلکہ عالمی سیاست اور معیشت پر بھی مرتب ہو سکتے ہیں۔
By 
