اقوام متحدہ کے سیکرٹری جنرل انتونیو گوتریس نے ایران کے خلاف جاری فوجی کارروائیوں پر گہری تشویش کا اظہار کرتے ہوئے امریکہ اور اسرائیل سے مطالبہ کیا ہے کہ وہ اس جنگ کو فوری طور پر بند کریں۔
تفصیلات کے مطابق سیکر ٹری جنرل اقوام متحدہ انتونیو گوئترس نے خبردار کیا ہے کہ اسرائیل ، امریکہ اور ایران تنازع نہ صرف خطے بلکہ پوری دنیا کو ایک بڑی تباہی کی طرف دھکیل رہا ہے۔
سیکرٹری جنرل نے اپنے بیان میں جنگ کے ہولناک نتائج پر روشنی ڈالتے ہوئے کہا: جاری جنگ شدید انسانی مصائب کا باعث بن رہی ہے، جس میں معصوم جانوں کا زیاں اور بڑے پیمانے پر نقل مکانی شامل ہے۔
جنگ کے باعث عالمی سطح پر معاشی اثرات انتہائی تباہ کن ہو رہے ہیں، خاص طور پر تیل کی قیمتوں میں حالیہ ریکارڈ اضافے نے دنیا بھر کی معیشتوں کو ہلا کر رکھ دیا ہے۔
انتونیو گوتریس نے دو ٹوک الفاظ میں کہا کہ سفارت کاری اور مذاکرات ہی مسائل کا واحد حل ہیں۔ انہوں نے زور دیا: “اب وقت آگیا ہے کہ امریکہ اور اسرائیل ہوش کے ناخن لیں اور اس جنگ کو فوری طور پر روک دیں۔ دنیا مزید خون خرابے اور معاشی عدم استحکام کی متحمل نہیں ہو سکتی۔”
اقوام متحدہ کے اس مطالبے کو عالمی سطح پر بڑی اہمیت دی جا رہی ہے، کیونکہ: تیل کا بحران: ماہرین کا ماننا ہے کہ اگر جنگ مزید طویل ہوئی تو عالمی سپلائی چین مکمل طور پر مفلوج ہو سکتی ہے۔
علاقائی استحکام: مشرقِ وسطیٰ کے دیگر ممالک میں بھی اس جنگ کے اثرات پھیلنے کا خدشہ ظاہر کیا جا رہا ہے۔
سیکرٹری جنرل کے اس بیان کے بعد عالمی برادری کی نظریں اب واشنگٹن اور تل ابیب پر جمی ہیں کہ آیا وہ اقوام متحدہ کی اس اپیل پر کان دھرتے ہیں یا جنگی جنون برقرار رہتا ہے۔
By 
