اپنا گھر بنانے کے خواہشمند افراد کےلئے بڑی خبر

وفاقی حکومت نے اسلام آباد میں بڑھتی ہوئی رہائشی ضروریات کو مدنظر رکھتے ہوئے دو نئے سیکٹرز متعارف کروانے کا فیصلہ کر لیا ہے، جن سے نہ صرف سرکاری افسران بلکہ مختلف شعبوں سے تعلق رکھنے والے ملازمین بھی فائدہ اٹھا سکیں گے۔

حکام کے مطابق سیکٹر ایف 12 اور جی 12 کو رواں ماہ لانچ کیا جائے گا۔ اسلام آباد ہاؤسنگ اتھارٹی کا کہنا ہے کہ سیکٹر ایف 12 کا لے آؤٹ پلان مکمل کر لیا گیا ہے جبکہ سیکٹر جی 12 کا پلان تیزی سے تیار کیا جا رہا ہے اور جلد مکمل ہو جائے گا۔

ذرائع کے مطابق ہاؤسنگ اتھارٹی کے ایگزیکٹو بورڈ نے گزشتہ ماہ دونوں سیکٹرز کی منظوری دے دی تھی۔ اس کے ساتھ وفاقی وزیر کی ہدایت پر سیکٹر ایف 14 اور ایف 15 میں بھی ترقیاتی کام شروع کر دیے گئے ہیں تاکہ شہریوں کے لیے رہائشی سہولیات میں مزید اضافہ کیا جا سکے۔

یہ بھی پڑھیں: پاکستان کی سعودی عرب پرایرانی حملوں کی شدید مذمت ،مکمل یکجہتی کا اعلان

حکام نے بتایا کہ ان منصوبوں کا مقصد اسلام آباد میں بڑھتی ہوئی رہائشی ضروریات کو پورا کرنا اور شہریوں کو بہتر معیار کی رہائش فراہم کرنا ہے۔ نئی رہائشی سہولیات میں سڑکیں، پانی کی فراہمی، بجلی اور دیگر بنیادی سہولیات شامل ہوں گی۔

اسلام آباد ہاؤسنگ اتھارٹی نے عوام سے اپیل کی ہے کہ وہ معلومات کے لیے صرف سرکاری اعلانات پر انحصار کریں اور کسی بھی غیر مصدقہ خبر پر بھروسہ نہ کریں۔ حکام کے مطابق نئے سیکٹرز کے آغاز کے بعد شہریوں کو خریداری اور رہائش کے حوالے سے مزید آسانی میسر آئے گی۔