پاکستان ہمیشہ اپنے سعودی بھائیوں کے شانہ بشانہ کھڑا رہے گا، وزیراعظم

وزیراعظم محمد شہباز شریف نے سعودی عرب کے ولی عہد اور وزیراعظم، اعلیٰ حضرت شہزادہ محمد بن سلمان بن عبدالعزیز آل سعود کے ساتھ ٹیلی فونک رابطہ کیا ہے۔ اس گفتگو میں دونوں رہنماؤں نے خطے میں جاری کشیدگی اور حالیہ واقعات پر تفصیلی تبادلہ خیال کیا۔

گفتگو کے دوران وزیراعظم نے سعودی عرب کے لیے پاکستان کی غیر متزلزل یکجہتی اور بھرپور حمایت کا اعادہ کیا اور آج صبح سعودی عرب میں الجبیل کی تیل کی تنصیبات پر ہونے والے حملے کی سخت الفاظ میں مذمت کی۔ انہوں نے ولی عہد کو یقین دلایا کہ پاکستان کے عوام اور حکومت ہر وقت اپنے سعودی بھائیوں اور بہنوں کے ساتھ کھڑے رہیں گے، بالکل اسی طرح جیسے سعودی قیادت اور عوام نے ہمیشہ مشکل اور آسان وقت میں پاکستان کا ساتھ دیا ہے۔

وزیراعظم نے سعودی قیادت کی دانشمندی اور حکمت کو سراہتے ہوئے کہا کہ موجودہ بحران کے دوران سعودی قیادت نے زیادہ سے زیادہ صبر و تحمل کا مظاہرہ کیا ہے۔ انہوں نے مزید کہا کہ پاکستان خطے میں امن کے قیام اور کشیدگی کو کم کرنے کی کوششوں میں دیگر ممالک کے ساتھ مل کر بھرپور کردار ادا کر رہا ہے اور ولی عہد کو پاکستان کی ثالثی کوششوں اور اقدامات کے بارے میں آگاہ کیا۔

اس موقع پر وزیراعظم نے خادمِ حرمین شریفین، اعلیٰ حضرت شاہ سلمان بن عبدالعزیز آل سعود کے لیے نیک خواہشات اور احترام بھرا پیغام بھی پہنچایا۔

یہ بھی پڑھیں: ایران کے سعودی عرب پر حملے سے خطے میں کشیدگی میں شدید اضافے اور صورتحال کے مزید حساس ہونے کا خدشہ، ماہرین کا انتباہ

دوسری جانب سعودی ولی عہد نے پاکستان کی ثالثی اور امن قائم کرنے کی کوششوں کی تعریف کی اور کہا کہ پاکستان کے اقدامات خطے میں امن اور استحکام کے قیام کے لیے قابلِ ستائش ہیں۔

اس ٹیلی فونک رابطے میں دونوں ممالک کے درمیان تاریخی بھائی چارے اور دو طرفہ تعلقات کی اہمیت دوبارہ اجاگر ہوئی اور موجودہ کشیدگی میں باہمی تعاون کے ذریعے خطے میں امن قائم رکھنے پر زور دیا گیا۔

یہ رابطہ سعودی عرب اور پاکستان کے درمیان دیرینہ دوستانہ تعلقات اور خطے میں قیام امن کے لیے دونوں ملکوں کی مشترکہ ذمہ داری کا عکاس ہے، جس میں دونوں رہنما موجودہ حالات کے تناظر میں مثبت اور تعمیری اقدامات پر متفق نظر آئے۔