روٹی قیمتیں مقرر، عدالت کا تحریری فیصلہ جاری

اسلام آباد ہائی کورٹ نے انتظامیہ اور نان بائی ایسوسی ایشن کے درمیان نان اور روٹی کی قیمت طے پا جانے سے متعلق تحریری فیصلہ جاری کر دیا ۔

اسلام آباد ہائی کورٹ کے جسٹس طارق محمود جہانگیری نے 3 صفحات پر مشتمل تحریری فیصلہ جاری کر دیا ۔ فیصلے میں کہا گیا ہے کہ عدالتی احکامات پر ضلعی انتظامیہ اور نان بائی ایسوسی ایشن کے درمیان اجلاس ہوا، دونوں فریقین کے درمیان نان اور روٹی کی قیمت پر اتفاق کے بعد نیا نوٹیفکیشن جاری کر دیا گیا۔

یہ بھی پڑھیں: شہباز شریف نے 90 تحائف میں سے کتنے تحائف اپنے پاس رکھے؟ تفصیلات سامنے آگئیں

شہری علاقوں میں 100 گرام روٹی کی قیمت 18 روپے جبکہ 120 گرام نان کی قیمت 22 روپے مقرر کر دی گئی ہے، دیہی علاقوں میں 100 گرام روٹی کی قیمت 16 روپے اور 120 گرام نان کی قیمت 20 روپے مقرر کر دی گئی ہے، متفقہ قیمتوں سے متعلق جاری نوٹیفکیشن عدالت میں جمع کروا دیا گیا ہے، ضلعی انتظامیہ اور نان بائی ایسوسی ایشن ان قیمتوں سے مطمئن ہیں۔

عدالت نے اپنے تحریری فیصلے میں حکم دیا کہ نان بائی ایسوسی ایشن کے گرفتار اراکین کو فوری طور پر رہا کر دیا جائے ، درخواست گزار وکیل کے مطابق وہ اس درخواست کو واپس لینا چاہتے ہیں، نان بائی ایسوسی ایشن کی درخواست فائدہ مند ثابت ہونےپر نمٹائی جاتی ہے۔