حکومت نے بجٹ میں بے نظیر انکم سپورٹ پروگرام سے متعلق بڑی خوشخبری سنا دی

وفاقی حکومت نے نئے مالی سال کے بجٹ میں ملک کے کم آمدنی والے اور مستحق خاندانوں کو مزید ریلیف فراہم کرنے کے لیے بینظیر انکم سپورٹ پروگرام (بی آئی ایس پی) کے فنڈز میں نمایاں اضافے کی تجویز پیش کر دی ہے۔

بجٹ دستاویزات کے مطابق سماجی تحفظ کے ملک کے سب سے بڑے پروگرام کے لیے 838 ارب روپے مختص کرنے کی سفارش کی گئی ہے، جو گزشتہ مالی سال کے مقابلے میں 17 فیصد زیادہ ہے۔

وزیر خزانہ نے بجٹ تقریر کے دوران کہا کہ حکومت مہنگائی اور بڑھتے ہوئے معاشی دباؤ سے متاثرہ طبقات کی مشکلات کم کرنے کے لیے سماجی تحفظ کے پروگراموں کو مزید مضبوط بنانا چاہتی ہے۔ اسی مقصد کے تحت بی آئی ایس پی کے بجٹ میں خاطر خواہ اضافہ تجویز کیا گیا ہے تاکہ زیادہ سے زیادہ مستحق خاندانوں کو مالی معاونت فراہم کی جا سکے۔

یہ بھی پڑھیں: وزیراعظم کی قیادت میں حکومت کا بجٹ میں عوامی ریلیف، معاشی استحکام اور ترقی کی جانب اہم پیش رفت

حکومتی مؤقف کے مطابق اضافی فنڈز سے نہ صرف موجودہ مستفید ہونے والے خاندانوں کو سہولت ملے گی بلکہ پروگرام کے دائرہ کار کو بھی وسعت دی جائے گی۔ اس اقدام کے ذریعے کمزور اور پسماندہ طبقات کی زندگیوں میں بہتری لانے اور انہیں بنیادی ضروریات پوری کرنے میں مدد فراہم کرنے کا ہدف رکھا گیا ہے۔

معاشی ماہرین کا کہنا ہے کہ موجودہ معاشی حالات میں سماجی تحفظ کے پروگراموں کی اہمیت مزید بڑھ گئی ہے۔ ان کے مطابق بی آئی ایس پی کے لیے فنڈز میں اضافہ لاکھوں خاندانوں کے لیے ایک مثبت قدم ثابت ہو سکتا ہے، خاص طور پر ایسے وقت میں جب مہنگائی نے عام شہری کی قوت خرید کو متاثر کیا ہے۔