By وزیر اعلیٰ خیبر پختونخوا علی امین خان گنڈاپور سے برطانوی ہائی کمشنر جین میرئیٹ نے ملاقات کی ہے جس میں دونوں رہنماؤں کے مابین باہمی دلچسپی کے امور پر تبادلہ خیال ہوا۔
تفصیلات کے مطابق خیبر پختونخوا میں برطانوی حکومت کے مختلف اداروں کے اشتراک سے عوامی فلاح و بہبود کے اقدامات پر بھی ان کے مابین بات چیت ہوئی ۔ وزیر اعلیٰ کے معاون خصوصی برائے اطلاعات بیرسٹر محمد علی سیف، ایڈیشنل چیف سیکرٹری پلاننگ سید امتیاز حسین شاہ اور دیگر بھی ملاقات میں موجود تھے۔ اس موقع پر وزیر اعلیٰ علی امین گنڈا پور نے کہا کہ صوبے میں عوامی فلاح و بہبود کے لیے برطانوی اداروں کے تعاون اور اشتراک کو قدر کی نگاہ سے د یکھتے ہیں ، مستقبل میں برطانیہ کیساتھ باہمی اشتراک کو مزید وسعت دینا چا ہتے ہیں ، موجودہ صوبائی حکومت صوبے میں برطانوی سرمایہ کار اداروں کی طرف سے سرمایہ کاری کی خواہاں ہے۔
سردار علی امین گنڈاپورنے کہا کہ صوبے میں معدنیات، توانائی اور سیاحت سمیت دیگر شعبوں میں بیرونی سرمایہ کاری کے بے پناہ مواقع موجود ہیں، صوبائی حکومت پبلک پرائیویٹ پارٹنرشپ ماڈل کے تحت غیر ملکی کمپنیوں کے ساتھ اشتراک کار کو فروغ دینا چاہتی ہے، بیرونی سرمایہ کاروں کی سہولت کے لئے سرمایہ کاری کے پیچیدہ مراحل کو آسان بنانے پر کام کررہے ہیں، علی امین گنڈاپور نے کہا کہ صوبے میں غیر ملکی سرمایہ کاری کے لئے سازگار ماحول فراہم کریں گے ، صوبائی حکومت امن و امان کی صورتحال کو بہتر بنانے کے لئے ٹھوس اقدامات کر رہی ہے، دہشت گردی سے مستقل نجات کے لیے لوگوں کو تعلیم اور روزگار دینے کی ضرورت ہے، موجودہ صوبائی حکومت اس سلسلے میں ایک جامع منصوبہ بندی کے تحت کام کر رہی ہے۔
وزیر اعلیٰ کا مزید کہنا تھا کہ زراعت کے شعبے کی ترقی کے لئے سمال ڈیموں کی تعمیر پر کام کر رہے ہیں، زراعت کے شعبے کو ترقی دے کر لوگوں کے لئے روزگار کے مواقع پیدا کئے جائیں گے، علی امین گنڈا پور نے کہا کہ نوجوانوں کو اپنا روزگار دینے کے لئے انہیں بلاسود قرضے فراہم کئے جارہے ہیں، نوجوانوں کو تعلیم اور روزگار دینے کے لئے ڈونر اداروں کے تعاون کی ضرورت ہے، دہشتگردی کے خلاف جنگ میں فرنٹ لائن صوبہ ہے، وزیر اعلی اس جنگ میں صوبے خصوصاً ضم اضلاع کے لوگ بہت ذیادہ متاثر ہوئے ہیں، ضم اضلاع میں انفراسٹرکچر کی بحالی کے لئے خصوصی اقدامات کی ضرورت ہے، اس موقع پر صوبائی حکومت اور برطانوی اداروں کے درمیان عوامی فلاح و بہبود کے منصوبوں میں اشتراک کار کو مزید وسعت دینے پر اتفاق کیا گیا ۔
