By وفاقی حکومت نے ملکی سلامتی اور سکیورٹی کے تناظر میں بیرون ملک پناہ لینے والوں کو پاسپورٹ جاری نہ کرنے کا فیصلہ کیا ہے۔
وفاقی وزیر داخلہ محسن نقوی کے احکامات پر وزارت داخلہ نے اس حوالے سے مراسلہ وزارت خارجہ اور دیگر متعلقہ حکام کو ارسال کردیا ہے۔جاری مراسلے میں کہا گیا ہے کہ ایسے تمام پاکستانی جو کسی بھی بنیاد پر دوسرے ممالک میں پناہ لیں گے، ان کو پاسپورٹ نہیں ملے گا ، ذرائع کے مطابق ایسے پاکستانیوں کے پاسپورٹ منسوخ اور دوبارہ تجدید بھی نہیں ہو ں گے ۔ نا صرف ایسے پاکستانیوں کے پاسپورٹ منسوخ کردیے جائیں گے بلکہ ان کے پاس پہلے موجود پاسپورٹ کی دوبارہ تجدید بھی نہیں کی جائے گی۔
یہ بھی پڑھیں: سوشل میڈیا پر لگام ڈالنےکی تیاریاں، انٹرنیٹ سروس فراہم کرنیوالی کمپنیاں راضی ہو گئیں
دوسری جانب گزشتہ ہفتے وفاقی وزیرداخلہ محسن نقوی نے لندن میں پاسپورٹ اور نادرا سنٹرز کا دورہ کیا گیا تھا، انہوں نے دنیا بھر میں مقیم پاکستانیوں کو پاسپورٹ کے اجرا میں تاخیر کا نوٹس لیتے ہوئے انہیں ارجنٹ پاسپورٹ 7 روز میں جاری کرنے کا حکم دیا تھا۔
وزارت داخلہ کی جانب سے جاری اعلامیے کے مطابق وزیر داخلہ نے کہا کہ دیار غیر میں رہنے والے پاکستانیوں کو نارمل پاسپورٹ 30 روز میں جاری کیا جائے گا ،اس پالیسی کا اطلاق دنیا بھر میں موجود تمام پاکستانی مشنز پر ہوگا، فی الوقت اوورسیز پاکستانیوں کو نارمل پاسپورٹ 4 ماہ جبکہ ارجنٹ پاسپورٹ ڈیڑھ ماہ میں مل رہا تھا۔
وفاقی وزیر داخلہ محسن نقوی نے کہا کہ پاسپورٹ میں تاخیر کسی صورت برداشت نہیں، مقرر کردہ مدت کے اندر پاسپورٹ جاری نہ ہوا تو متعلقہ افسران کے خلاف ایکشن لیا جائے گا۔
