بارشوں کا سلسلہ 7 جولائی تک جاری رہنے کی پیشنگوئی، ندی نالوں میں سیلابی صورتحال اور طغیانی کا خطرہ

محکمہ موسمیات نے ملک بھر میں 7جولائی تک بارشوں کا سلسلہ جاری رہنے کی پیشنگوئی کر دی۔

محکمہ موسمیات کے مطابق 05 سے 07 جولائی کے دوران تیز/ موسلا دھار بارش سے اسلام آباد، راولپنڈی، مری، گلیات، مانسہرہ، کوہستان، ایبٹ آباد، دیر، سوات، کشمیر اور ڈیرہ غازی خان کے پہاڑی ندی نالوں میں سیلابی صورتحال /طغیانی کا خطرہ ہےجبکہ لاہور، سیالکوٹ، گوجرانوالہ، نارووال، راولپنڈی، فیصل آباد اور پشاور میں اربن فلڈ نگ کا خدشہ ہے۔ شدید بارشوں کے باعث مشرقی دریاؤں میں پانی کے بہاؤ میں اضافے کا امکان ہے۔ شدید بارشوں کے باعث خیبرپختونخوا کے پہاڑی علاقوں ، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ ہوگا۔

مزید پڑھیں: مون سون بارشوں سے سیلابی صورتحال پیدا ہونے کا خدشہ

دوسری جانب سندھ کے بیشتر مقامات پر موسم گرم اور مرطوب رہے گا جبکہ ساحلی علاقوں میں کہیں کہیں بوندا باندی کا امکان ہے۔ محکمہ موسمیات کے مطابق جمعہ کے روز خیبرپختونخوا، خطۂ پوٹھوہار، اسلام آباد،بالائی/ وسطی پنجاب، شمال مشرقی بلوچستان اورکشمیر میں تیز ہواؤں اور گرج چمک کے ساتھ بارش کا امکان ۔اس دوران چند مقاما ت پر موسلادھار بارش بھی متوقع۔ گلگت بلتستان اور جنوبی پنجاب میں چند مقامات پر تیز ہواؤں اور گرج چمک کے ساتھ بارش کی بھی توقع۔