ثانیہ مرزا کے ساتھ شادی کی خبریں ، بھارتی کرکٹر محمد شامی کا بیان آگیا

بھارتی کرکٹ ٹیم کے فاسٹ باؤلر محمد شامی نے ٹینس سٹار ثانیہ مرزا کے ساتھ شادی کی افواہوں پر خاموشی توڑ دی ہے۔

جمعے کو ایک پوڈ کاسٹ میں محمد شامی نے ان افواہوں پر بات کرتے ہوئے ایسی باتیں کرنے والوں کو تنقید کا نشانہ بنایا ، انہوں نے لوگوں سے کہا کہ وہ سوشل میڈیا پر زیادہ جھوٹ پھیلانے سے گریز کریں اور اس طرح کے میمز اگرچہ تفریح فراہم کر سکتے ہیں لیکن یہ نقصان دہ بھی ہو سکتے ہیں۔

، بھارتی کرکٹر نے کہا کہ میں سب سے گزارش کرتا ہوں کہ سوشل میڈیا پر ذمہ داری کا مظاہرہ کریں اور ایسی بے بنیاد خبریں پھیلانے سے گریز کریں،  ثانیہ مرزا سے شادی کے حوالے سے گردش کرنے والی خبریں عجیب ہیں، جب بھی موبائل دیکھتا ہوں اپنی تصویر ہر جگہ نظر آتی ہے۔

فاسٹ باؤلر نے ثانیہ مرزا کے ساتھ سوشل میڈیا پر وائرل ہونے والی میمز کے حوالے سے کہا کہ ’عجیب ہی ہے اور ہے کیا اس میں؟ زبردستی کیا ہے پر کیا کریں؟ تصویر کھولو تو اپنی ہی تصویر نظر آتی ہے، لیکن میں ایک چیز بولنا چاہوں گا، میں مانتا ہوں میمز آپ کے مذاق کے لیے ہے لیکن کسی کی زندگی سے متعلق ہوتے ہیں، تو آپ کو بڑی سوچ سمجھ کر میمز بنانے چاہییں۔

محمد شامی نے مزید کہا کہ ’لیکن میں ایک ہی چیز بولنا چاہوں گا، اگر آپ میں دم ہے تو ویری فائیڈ پیج سے بول کے دکھاؤ، پھر ہم بتاتے ہیں، دوسرے کی ٹانگ کھینچنا بہت آسان ہے، کامیابی حاصل کرو، اپنا لیول اوپر کرو۔ تب میں مانوں گا آپ اچھے انسان ہے۔‘

واضح رہے کہ کچھ  عرصے سے ثانیہ  اور شامی کی شادی کے حوالے سے خبریں سوشل میڈیا پر گردش کر رہی ہیں۔

بھارتی میڈیا کی جانب سے دعویٰ کیا کیا گیا تھا کہ معروف ٹینس سٹار ثانیہ مرزا جَلد ہی کرکٹر محمد شامی کے ساتھ شادی کرنے والی ہیں ، ثانیہ مرزا کے والد عمران مرزا نے محمد شامی سے دوسری شادی کی افواہوں پر سخت ردعمل دیتے ہوئے کہا تھا کہ یہ سب بکواس ہے، ثانیہ مرزا کی تو کبھی محمد شامی سے ملاقات تک نہیں ہوئی۔

یاد رہے کہ ثانیہ مرزا معروف قومی کرکٹر شعیب ملک کی سابقہ اہلیہ ہیں، اس سابق جوڑی کا ایک بیٹا اذہان مرزا ملک بھی ہے جو کہ اپنی والدہ کے ساتھ رہتا ہے۔