By امریکی صدر جو بائیڈن نے صدارتی انتخابات کی دوڑ سے دستبردار ہونے کا اعلان کردیا۔
سماجی رابطوں کی ویب سائٹ ایکس پر اپنے پیغام میں جو بائیڈن نے کہا کہ میں بطور امیدوار دستبردار ہو رہا ہوں لیکن جنوری 2025 میں اپنی مدت ختم ہونے تک صدر اور کمانڈر ان چیف کے طور پر کام کرتا رہوں گا اور اس ہفتے قوم سے خطاب کروں گا۔
ان کا کہنا تھا کہ آپ کے صدر کی حیثیت سے خدمات انجام دینا میری زندگی کا سب سے بڑا اعزاز رہا ہے اور گوکہ میرا دوبارہ صدر منتخب ہونے کا ارادہ تھا لیکن مجھے یقین ہے کہ یہ میری پارٹی اور ملک کے بہترین مفاد میں ہے کہ میں اپنے عہدے سے دستبردار ہو جاؤں اور اپنی بقیہ مدت کے لیے صدر کی حیثیت سے اپنی ذمہ داریوں کو پورا کرنے پر پوری توجہ مرکوز کروں۔
یہ بھی پڑھیں:بنگلا دیش میں طلبہ کا احتجاج : سپریم کورٹ کا کوٹہ سسٹم پر عمل درآمد روکنے کا حکم
بائیڈن کے دستبردار ہونے کے بعد موجود نائب صدر کمالا ہیرس صدر کے منصب کے لیے مضبوط ترین امیدوار بن گئی ہیں اور اگر وہ صدر منتخب ہو جاتی ہیں تو اس مسند پر براجمان ہونے والی پہلی ملک کی سیاہ فام خاتون ہوں گی۔
واضح رہے کہ صدر جو بائیڈن پر ڈیموکریٹ پارٹی کی طرف سے دستبرداری کےلیے شدید دباؤ تھا۔
