سونے کی قیمت میں حیران کن کمی ، گولڈ مارکیٹ ہل کر رہ گئی

عالمی اور مقامی صرافہ مارکیٹوں میں سونے کی قیمتوں میں نمایاں کمی ریکارڈ کی گئی ہے جس کے باعث پاکستان میں بھی سونے کے نرخ ایک ہی دن میں کئی ہزار روپے نیچے آ گئے ہیں۔

جیولرز کے مطابق پاکستان میں 24 قیراط فی تولہ سونے کی قیمت 14 ہزار 900 روپے کمی کے بعد 4 لاکھ 38 ہزار 36 روپے پر آ گئی ہے۔ اسی طرح 10 گرام سونے کی قیمت میں 14 ہزار 510 روپے کی کمی ہوئی جس کے بعد نئی قیمت 3 لاکھ 74 ہزار 205 روپے ریکارڈ کی گئی۔

دوسری جانب چاندی کی قیمت میں بھی کمی دیکھی گئی ہے۔ مقامی مارکیٹ میں فی تولہ چاندی 413 روپے سستی ہوکر 6 ہزار 946 روپے پر آ گئی۔

یہ بھی پڑھیں:وزیر اعظم نے پیٹرولیم مصنوعات کی قیمتوں میں کمی کی بڑی خوشخبری دے دی

عالمی مارکیٹ میں بھی سونے کے نرخوں میں نمایاں کمی ریکارڈ کی گئی۔ بین الاقوامی مارکیٹ میں فی اونس سونا 149 ڈالر کمی کے بعد 4 ہزار 156 ڈالر کی سطح پر پہنچ گیا۔

 عالمی سطح پر سونے کی قیمتوں میں اتار چڑھاؤ کا اثر براہ راست مقامی مارکیٹ پر پڑتا ہے۔ عالمی مارکیٹ میں کمی، ڈالر کی قدر اور سرمایہ کاروں کے رجحانات سونے کے نرخوں کو متاثر کرنے والے اہم عوامل ہیں۔

سونے کی قیمتوں میں حالیہ کمی سے زیورات خریدنے والے صارفین کو وقتی ریلیف ملنے کی توقع ہے تاہم مارکیٹ کے ماہرین کا کہنا ہے کہ عالمی معاشی صورتحال اور سرمایہ کاروں کی سرگرمیوں کے باعث آنے والے دنوں میں قیمتوں میں مزید اتار چڑھاؤ ممکن ہے۔