By جبران الیاس کا ریاست مخالف بیانیہ، رؤف حسن کے ساتھ ہوشربا واٹس ایپ پیغامات سامنے آگئے۔ غیر ملکی ایجنڈے پر کاربند جبران الیاس بیرونِ ملک سے پی ٹی آئی کا ریاست مخالف بیانیہ چلا رہا ہے، جس نے رؤف حسن کے ساتھ واٹس ایپ پر ہدایات کے ذریعے سازش کا پول کھول دیا۔
ذرائع کے مطابق جبران الیاس نے سانحہ 9 مئی کے ایک سال مکمل ہونے کے موقع پر پروپیگنڈہ پھیلانے کے لیے رؤف حسن کو ہدایات دیں۔ دسمبر 2023 سے مئی 2024 تک، تصاویر، ویڈیوز اور پیغامات کے ذریعے مختلف بیانیے جبران الیاس نے رؤف حسن کو بھیجے، جن میں 9 مئی سے متعلق فتنہ پھیلانے والی ویڈیوز اور ہیش ٹیگز بھی شامل تھے۔
رواں سال یکم مئی کو جبران الیاس نے رؤف حسن کو ٹی وی چینلز کے اسکرین شاٹس بھیجے، جن میں جسٹس اطہر من اللہ اور جسٹس قاضی فائز عیسیٰ کے 9 مئی کے حوالے سے ریمارکس بھی شامل تھے۔ اس کے علاوہ، جبران الیاس نے سوشل میڈیا پر چلائے گئے ٹرینڈز “مداخلت ہوتی ہے” اور “مئی 9 فالس فلیگ” بھی شئیر کیے۔
جبران الیاس نے جھوٹے پروپیگنڈے کے لیے رؤف حسن کو واٹس ایپ پر ہدایات دیتے ہوئے کہا کہ؛ “ہم نے ایک گوگل ڈرائیو بنا لی ہے جس میں نو مئی سے متعلقہ فالس فلیگ آپریشنز کے تمام ڈیٹا محفوظ ہے، کیونکہ 9 مئی 2024 قریب آرہا ہے۔
جبران الیاس نے مزید کہا کہ “ٹیم، فالس فلیگ ہیش ٹیگ اب بھی ٹرینڈ کر رہا ہے، آئیے اسے آگے بڑھاتے رہیں۔ 7 مئی کو انہوں نے پی ٹی آئی کی سوشل میڈیا ٹیم کی شرانگیزی کی تعریف کرتے ہوئے کہا کہ “پچھلے سات دنوں کے دوران سب نے بہت اچھا کام کیا ہے، ایسا لگتا ہے کہ ہماری 9 مئی کی فالس فلیگ آپریشن کی مہم انتہائی موثر رہی ہے۔”
ذرائع نے مزید بتایا کہ 14 مئی کے پیغام میں جبران الیاس نے رؤف حسن سے سوشل میڈیا پروپیگنڈسٹ کے لیے تنخواہوں کا تقاضہ کیا، جو اس بات کی غمازی کرتا ہے کہ پی ٹی آئی کی جانب سے سوشل میڈیا پر زہریلا پروپیگنڈا باقاعدہ منظم منصوبے کے تحت پھیلایا جاتا ہے۔ جبران الیاس کا کہنا تھا؛ “السلام علیکم رؤف صاحب، کیا آپ سوشل میڈیا والوں کی تنخواہیں جاری کرنے میں میری مدد کر سکتے ہیں؟ جب ان کی تنخواہیں روکی جاتی ہیں تو وہ بہت تذلیل محسوس کرتے ہیں۔”
سیاسی تجزیہ نگاروں کے مطابق، مذکورہ بالا تمام واٹس ایپ پیغامات سے یہ بات واضح ہے کہ پی ٹی آئی کے سوشل میڈیا پر جبران الیاس کی مکمل گرفت ہے، جو اس وقت غیر ملکی سرزمین پر بیٹھا ہے۔تجزیہ نگاروں کا کہنا ہے کہ جبران الیاس کے پس پردہ بھارتی اور صہیونی لابیز ہیں، اور انہی کی ہدایات اور پالیسی کے مطابق یہ شخص سوشل میڈیا کو چلا رہا ہے۔ بیرونی ایماء پر 9 مئی سانحے کو متنازعہ بنانے کی پلاننگ میں جبران الیاس اور رؤف حسن کا اہم کردار ہے۔
سیاسی تجزیہ نگاروں نے ان پیغامات سے یہ بات اخذ کی ہے کہ عدلیہ میں ججز کے سیاسی کیسز میں دیے گئے ریمارکس کو بطور ریاست مخالف پروپیگنڈا استعمال کیا جا رہا ہے۔ بیرون ملک بیٹھے ذرائع ابلاغ کے نام نہاد نمائندے بھی پی ٹی آئی کے ریاست مخالف بیانیہ کو پھیلانے میں مدد دے رہے ہیں۔
جبران الیاس کا سوشل میڈیا ایکٹیوسٹ کی تنخواہوں کا تقاضہ کرنا اس بات کا کلیدی ثبوت ہے کہ پی ٹی آئی کی جانب سے ریاست مخالف بیانیہ پھیلانے کے لیے باقاعدہ فنڈنگ کی جا رہی ہے۔
