امریکا کا جنگی طیارہ گر کر تباہ

دنیا کے 2 بڑے ممالک کی فضائیہ کو 24 گھنٹوں کے دوران حادثات کا سامنا کرنا پڑا ہے۔ واشنگٹن امریکا میں معمول کی تربیتی پرواز کے دوران امریکی میرین کور کا ایک جدید لڑاکا طیارہ ایف اے 18 ہارنیٹ پہاڑی علاقے میں گر کر تباہ ہو گیا، تاہم پائلٹ بروقت ایجیکٹ کرنے کے باعث جان بچانے میں کامیاب رہا۔ دوسری جانب، بھارتی ریاست آسام میں فوجی طیارے کے حادثے میں 5 اہلکار ہلاک ہو گئے۔

بین الاقوامی خبر رساں اداروں کے مطابق امریکی ریاست واشنگٹن میں پیش آنے والے واقعے میں امریکی میرین کور کا لڑاکا طیارہ ایف اے 18 ہارنیٹ معمول کے تربیتی مشن پر تھا کہ اچانک تکنیکی خرابی کے باعث پہاڑی سلسلے میں گر گیا۔

پائلٹ محفوظ رہا

حادثے کے فوری بعد ریسکیو ٹیمیں روانہ کی گئیں، خوش قسمتی سے پائلٹ نے طیارے کے زمین پر گرنے سے قبل کامیابی سے ایجیکٹ کر لیا، جس کے باعث کوئی جانی نقصان نہیں ہوا۔ امریکی حکام نے واقعے کی تحقیقات کا حکم دے دیا ہے۔

یہ بھی پڑھیں:دبئی ایئر شو میں بھارتی طیارہ گرنے پر بالی ووڈ فنکاروں کی بھی مودی سرکار پر شدید تنقید

واضح رہے کہ اس حادثے سے ٹھیک ایک روز قبل بھارتی فضائیہ کو بھی ایک بڑا دھچکا لگا تھا، جب بھارتی ریاست آسام کے شہر جورہاٹ میں ایک فوجی طیارہ اے این 32 لینڈنگ کے دوران رن وے پر حادثے کا شکار ہو گیا۔

بھارتی فضائیہ کے ترجمان کے مطابق، طیارہ جورہاٹ ایئر بیس پر اتر رہا تھا کہ توازن بگڑنے کی وجہ سے اس میں خوفناک آگ لگ گئی۔ اس افسوسناک حادثے کے نتیجے میں طیارے میں سوار 5 اہلکار موقع پر ہی ہلاک ہو گئے جبکہ کو پائلٹ شدید زخمی حالت میں زندہ بچنے میں کامیاب رہا، جسے فوری طور پر فوجی ہسپتال منتقل کر دیا گیا۔

ایف اے 18 ہارنیٹ کی تاریخ

 یہ امریکا کا ایک انتہائی قابل اعتماد اور کثیر المقاصد لڑاکا طیارہ ہے جو امریکی بحریہ اور میرین کور کے زیرِ استعمال ہے۔

مزید پڑھیں:امریکہ ، دو لڑاکا طیارے ائیر شو کے دوران فضا میں ٹکرا کر تباہ ہو گئے ، پائلٹس محفوظ

تربیتی پروازوں کے دوران گرنے والے ان طیاروں کی وجوہات عام طور پر پرندوں کا انجن سے ٹکرانا (برڈ اسٹرائیک)، اچانک مکینیکل فیل ہونا یا پائلٹ کی کارکردگی کا دباؤ ہوتی ہیں۔ واشنگٹن ریاست کے پہاڑی علاقوں میں موسم کی اچانک تبدیلی بھی پروازوں کے لیے بڑا چیلنج بنتی ہے۔

بھارتی فضائیہ کا اے این 32 طیارہ

اے این 32 بنیادی طور پر یوکرین کا تیار کردہ ٹرانسپورٹ طیارہ ہے جو بھارتی فضائیہ طویل عرصے سے سامان اور اہلکاروں کی نقل و حمل کے لیے استعمال کر رہی ہے۔

بھارتی فضائیہ کا ریکارڈ حالیہ برسوں میں طیاروں کے حادثات کے لحاظ سے کافی خراب رہا ہے، جس کی بڑی وجہ پرانے بیڑے (فلیٹ) کی ناقص مینٹیننس اور اسپیئر پارٹس کی کمی بتائی جاتی ہے۔ آسام کا جورہاٹ ایئر بیس پہاڑی اور جنگلاتی علاقے کے قریب ہونے کی وجہ سے اکثر خراب موسم کی زد میں رہتا ہے۔