By اسلام آباد: وزیر خزانہ محمد اورنگزیب نے اعلان کیا ہے کہ دو وفاقی وزارتوں کو ضم کرنے اور ایک وزارت کو ختم کرنے کا فیصلہ کیا گیا ہے۔ یہ اقدام چھ وزارتوں کی رائٹ سائزنگ کے عمل کے تحت اٹھایا جا رہا ہے۔
وزیر خزانہ نے کہا کہ ٹیکس محصولات میں اضافہ ناگزیر ہے اور حکومت قوم کی امیدوں پر پورا اترنے کے لیے کوشاں ہے۔ انہوں نے بتایا کہ کابینہ نے تنخواہیں نہ لینے کا فیصلہ کیا ہے اور اس کے ساتھ دیگر اہم اقدامات بھی کیے جائیں گے۔محمد اورنگزیب نے یہ بھی کہا کہ گزشتہ سال کے مقابلے میں فائلرز کی تعداد دوگنا ہو گئی ہے، جو کہ 1.6 ملین سے بڑھ کر 3.2 ملین تک پہنچ چکی ہے۔ رواں سال 7 لاکھ 23 ہزار نئے فائلرز سسٹم میں شامل ہوئے ہیں، جس سے ٹیکس نیٹ کو بڑھانے کے اقدامات جاری رہیں گے۔
یہ بھی پڑھیں: مفت سولر سسٹم کے ساتھ انورٹر اور بیٹری کیسے ملے گی؟ عوام کیلئے اہم خبر
وزیر خزانہ نے مزید کہا کہ 3 لاکھ ہول سیلرز 25 فیصد سیلز ٹیکس میں رجسٹرڈ ہیں اور نان فائلرز کو گاڑیاں اور جائیدادیں خریدنے کی اجازت نہیں ہوگی۔ انہوں نے اس بات پر زور دیا کہ فائلرز کے اصل اثاثوں کی جانچ کی جائے گی۔اس کے علاوہ، 150,000 خالی آسامیوں کو ختم کرنے کا فیصلہ بھی کیا گیا ہے، جس میں کابینہ کی منظوری شامل ہے۔ وزیر خزانہ نے بتایا کہ 60 فیصد خالی پوسٹوں کو ختم کرنے کی کوششیں جاری ہیں۔
محمد اورنگزیب نے ٹیکنالوجی کے بھرپور استعمال کا وعدہ کیا اور کہا کہ اینٹی اسمگلنگ کے لیے ڈیجیٹل چیک پوسٹیں بنائی جائیں گی۔ انہوں نے یہ بھی کہا کہ ایف بی آر میں اصلاحات کے لیے آڈٹ کیپیسٹی کو بڑھایا جائے گا، جس کے لیے 2 ہزار سے زائد اکاؤنٹنٹس کو بھرتی کیا جائے گا۔
وزیر خزانہ نے آئی ایم ایف پروگرام کے بارے میں یقین دلایا کہ یہ آخری پروگرام ہوگا اور غریب عوام کو ریلیف دینے کی ضرورت پر زور دیا۔ انہوں نے صوبوں سے کہا ہے کہ وہ پرائس کنٹرول کمیٹیاں تشکیل دیں۔پیٹرولیم مصنوعات کی قیمتوں میں کمی کے بعد وزیر خزانہ نے کہا کہ دیگر مصنوعات کی قیمتیں بھی نیچے آنی چاہئیں اور اس حوالے سے صوبائی حکومتوں کے ساتھ کام کیا جائے گا۔
وزیر خزانہ نے یہ بات بھی کی کہ آئی ایم ایف پروگرام کے بارے میں چاروں وزرائے اعلیٰ کے سامنے پیش کیا گیا ہے، جن کی جانب سے تعاون کی یقین دہانی کرائی گئی ہے۔
