By شکیب الحسن کے بعد بنگلہ دیش کے ایک اور سینئر کرکٹر محمود اللہ نے ٹی 20 کرکٹ سے ریٹائرمنٹ کا فیصلہ کر لیا ۔
تفصیلات کے مطابق محمود اللہ نے پریس کانفرنس کرتے ہوئے کہا کہ بھارت کے خلاف یہ میری آخری ٹی ٹوئنٹی سیریز ہو گی تاہم انہوں نے کہا کہ وہ ون ڈےکرکٹ جاری رکھیں گے ۔
میں نے اس سے قبل ٹی ٹوئنٹی کرکٹ سے ریٹائرڈ ہونے کے حوالے سے اپنے خاندان، کوچ، کپتان، چیف سلیکٹر اور بورڈ کے صدر سے بھی بات چیت کی تھی۔ میرے خیال میں یہ فارمیٹ چھوڑنے کا درست وقت ہے۔
خاص طور پر جب 2سال سے کم عرصے میں ورلڈ کپ ہونے والا ہے۔ میں اب ون ڈے کرکٹ پر اپنی تمام تر توجہ مرکوز کرنا چاہتا ہوں۔ محمود اللہ جو اس وقت بنگلہ دیش کے دوسرے سب سے عمر رسیدہ کرکٹر ہیں۔
محمود اللہ 3 سال قبل ٹیسٹ کرکٹ سے ریٹائرمنٹ لے چکے ہیں ۔ انہوں نے اپنے ملک کیلئے 139 ٹی ٹوئنٹی میچز کھیلے ہیں اور اگر وہ بھارت کے خلاف سیریز کے آخری 2میچز بھی کھیلتے ہیں تو وہ 141 میچز کیساتھ ٹی ٹوئنٹی میں تیسرے سب سے زیادہ میچز کھیلنے والے بنگلہ دیشی کھلاڑی بن جائیں گے۔
محمود اللہ نے 2016 کے انٹر نیشنل کرکٹ کونسل ( آئی سی سی )ٹی ٹوئنٹی ورلڈ کپ کے دوران اپنے بیٹنگ کے انداز میں تبدیلی لانے کا ذکر کیا جو بھارت میں منعقد ہوا تھا۔ انہوں نے کہا کہ میں نے چھٹے یا ساتویں نمبر پر بیٹنگ کی، اس لئے اپنا بیٹنگ کا انداز اور حکمت عملی بدلی۔
یہ ٹیم کے لیے فنشر کا کردار تھا، جو ایک مشکل کام تھا۔ ہمیشہ آپ کھیل کو ختم نہیں کر سکتے۔ بھارت اور بنگلہ دیش کے درمیان سیریز کا دوسرا ٹی ٹوئنٹی میچ (آج ) بروز بدھ 9 اکتوبر کودہلی میں کھیلا جائے گا۔ بھارت کو سیریز میں 1-0 کی برتری حاصل ہے۔
