بنگلہ دیش کی عبوری حکومت کا کرنسی نوٹوں سے شیخ مجیب کی تصویر ہٹانے کا فیصلہ

بنگلہ دیش کی عبوری حکومت نے کرنسی نوٹوں سے شیخ مجیب الرحمن کی تصویر ہٹانے کا فیصلہ کر لیا ہے۔

بنگلہ دیشی میڈیا کے مطابق وزارت خزانہ اور مرکزی بینک نے اس فیصلے کی توثیق کر دی ہے اور بینک کو نئے نوٹوں کے ڈیزائن پیش کرنے کی ہدایت کی گئی ہے۔  ابتدائی طور پر چار کیٹیگریز کے نوٹوں کو دوبارہ ڈیزائن کیا جائے گا، جبکہ حکام نے بتایا ہے کہ تمام نوٹوں میں تبدیلیاں مرحلہ وار کی جائیں گی۔ 29 ستمبر کو وزارت خزانہ کے ایک خط میں بنگلہ دیش بینک کو ہدایت کی گئی تھی کہ وہ نئے نوٹوں کے لیے تفصیلی ڈیزائن کی تجاویز پیش کرے۔ مرکزی بینک کی کرنسی اور ڈیزائن ایڈوائزری کمیٹی ان تبدیلیوں کا جائزہ لینے اور سفارش کرنے میں کلیدی کردار ادا کرے گی۔

یہ بھی پڑھیں: یاماہا پاکستان کی نئی پیشکش، کوئی بھی بائیک لاؤ، نئی یاماہا لے جاؤ

خط میں کہا گیا ہے کہ بینک کی کرنسی اور ڈیزائن ایڈوائزری کمیٹی کی سفارشات کو قبول کرنے کے بعد جلد از جلد مخصوص تجویز فنانس ڈویژن کو بھیجی جائے، اور ڈیزائنوں کو حتمی شکل دینے میں فوری کارروائی کی ضرورت پر زور دیا گیا ہے۔

شیخ مجیب الرحمن کی تصویر ہٹانے کے اس فیصلے کو شیخ حسینہ کی حکومت کے دور میں ماضی کی روایات سے الگ ہونے کے طور پر دیکھا جا رہا ہے، جب کئی نوٹوں اور سکوں پر ان کی شبیہ نمایاں تھی۔